紫菜燕麥火雞丸

睇得呢個部落格多嘅，應該留意到，我係唔煮火雞㗎。
因為怕鞋熠熠，火雞，雞胸肉我同王子都唔食。
超市免治火雞肉大減價，又想挑戰下自己，睇下可唔可以將呢個健康食材，變成家中人氣食品。

買緊免治火雞肉時，王子來電，問:

>>做緊乜呀？>>買緊免治火雞肉>>吓？？乜話？？>>免治火雞肉呀>>火雞？？!!你買火雞??!!你有病呀？。。。。

哈哈，我要試用免治火雞肉，做紫菜燕麥火雞丸呀！
結果係，王子完全唔信呢個丸丸係火雞肉做嘅，話同豬肉丸無分別！
火雞肉健康啲，以後有大減價，一定會上倉用來整火雞丸。
加咗紫菜，彈牙肉丸中有啲爽口紫菜，正呀！
真係好，終於搵到個方法俾呢個健康食材入門啦。



紫菜燕麥火雞丸 :


材料﹕
免冶火雞肉 1 kg
紫菜1/4塊
炸亁葱片/炸洋葱片 40g
蒜茸1 1/2湯匙
燕麥4湯匙


調味:
鹽 1/3湯匙
生抽 2湯匙
糖 1湯匙
生粉 2湯匙
白胡椒粉1/4茶匙
泡打粉 2包(或跟包裝說明)
水1/2杯



紫菜用清水浸5分鐘，取出，略剪碎，
將所有調味、蒜茸、燕麥、炸亁葱片撈勺，
將免冶豬肉置入大鍋內，平均倒入紫菜及調味，
用hand mixer攪拌至肉粒消失及起膠，
肉漿有時會向上轉，可以用义壓番低佢，
亦可用KitchenAid mixer或者麵包機代勞，
入雪櫃雪至少5小時，
取出再用2隻鐵匙〝互畢〞肉漿至圓形然後直接放入1鍋凍水中，
完成所有後用中小火將肉丸煮熟。