我的網誌清單

2016年8月10日星期三

不羈

三色貓來我們家,起初嘅生活作息好穩定。
突然一晚,佢開始好夜返,之後,已經唔知佢幾時返,因為佢係可以從花園嘅一個小窗自出自入,我只係知道,佢有返過嚟瞓覺,因為我經常都幫佢執床,佢瞓過我係睇得出嘅。
後來,佢開始日間唔見咗人,變得越來越神出鬼沒。
某個周日,突然變得怪怪,有點神經質,經常出去又回來,逗留不長時間,又再出去。


然後,消失咗足足三日。
第一天,我跟王子說,三色貓太不羈啦,即使將來佢主人要求,我們實在也不能收養牠,不然,可能成日要萬里尋貓喎。
第二天,生活如常,想著它大概找到新家,貓過別枝啦,又或者,已經回到主人身邊。
第三天,開始好擔心,會唔會遇到意外呢,定係有壞人呢,發生咗乜事呢??一大堆疑問,於是捉埋王子一齊周圍行吓,睇下見唔見到佢。

王子養過咁多隻貓,剛剛入門嘅貓,都未試過係咁,無論點玩,都係會日日返屋企報到,要養咗好一段時間,先會偶然離家出走一陣。

王子都有啲擔心,我連忙叫佢通知佢主人,等對方得個知字。

終於响第三天晚上,突然門外有貓叫,起初以為係電視聲,原來係貓倦知還。。。
佢見到我哋,開心到不得了,不斷向我們發嗲。
完整無缺咁返黎,身上一點傷痕都無,亦無消瘦到。
知佢安全,我終於可以鬆一口氣啦。
我同王子馬上歡迎佢,幫佢按摩,檢查有無受傷嘅地方,提供乾淨水,仲有食物同零食。
開心過後,佢又出去小社區巡查吓。
不久,回來又再大吃,然後就開始睡覺。
見到佢嘅可愛面,我同王子,又唔再捨得話唔要佢啦。
我跟王子說,如果我們突然唔要佢,佢唔知會唔會好傷心呢。。。

畢竟,三色貓不在我家長大,我們對佢認知甚少,好多佢嘅脾性同習慣,我哋係一啲都唔知呢,一樣貓糧養百樣貓,可能佢係一隻不羈的貓呢!還是要慢慢觀察,了解多啲。

奉上三色貓瞓覺瞓到伸晒脷嘅樣,好萌爆啊。

26 則留言:

  1. 老世鐘意幾時返就幾時返, 好自我

    回覆刪除
  2. 真係貓兒心,海底針,估佢唔到。

    回覆刪除
    回覆
    1. 有好多佢嘅行為,我都係要睇研究資料先明白

      刪除
  3. 又按摩又檢查又餵食, 仲有執床, 想像到你們是對稱職兼恭敬的貓奴才啊!

    回覆刪除
    回覆
    1. 我時間比王子多,所以好多時候,關心佢,照顧佢同留意佢都係我,搞唔掂就搵埋王子幫手

      刪除
  4. 回覆
    1. 初頭一兩個星期真係似,日日都好攰,擔心又會特別多,但係依家就逐步適應緊,開始慢慢上軌道。。。

      刪除
  5. 回覆
    1. 睇情況佢今生都是個花花公子!

      刪除
    2. 佢係靚女一名,唔癡家果種

      刪除
  6. 失蹤嗰幾日佢有冇返過佢主人度?

    回覆刪除
    回覆
    1. 唔知呀,王子淨係得男主人電話,對方冇回覆,唔知係唔係睇唔到,定係唔再關心,定係有乜其他原因,本來三色貓返嚟,我想再通知佢三色貓平安,但係王子又覺得唔駛。。。

      刪除
  7. 真係好可愛,點捨得唔要佢

    回覆刪除
    回覆
    1. 係呀,其實佢仲好乖,個個鄰居都話,佢性格好親切

      刪除
  8. 伸利萌爆XXXD
    看來沒有表面傷痕應該只係愛流浪,不用太擔心吧

    回覆刪除
    回覆
    1. 因為愛流浪嘅貓有一定風險,出面嘅世界risk factors好多,但係就自由快樂,所以呢個永遠係貓家長嘅矛盾。。。

      刪除
  9. 真係好可愛,唔見三日真係會好擔心,好彩冇事回家

    回覆刪除
    回覆
    1. 係呀,真係唔習慣,突然間完全貓間蒸發咁,希望佢唔好成日係咁

      刪除
  10. 情況同我收養狗狗阿B一樣,好可愛,好乖。舊主人養咗10年,點捨得唔要佢!不負責任!

    回覆刪除
    回覆
    1. 佢有啲唔同,係佢自己要走,佢主人無唔要佢㗎,仲好錫佢添

      刪除
  11. 情況同我收養狗狗阿B一樣,好可愛,好乖。舊主人養咗10年,點捨得唔要佢!不負責任!

    回覆刪除