我的網誌清單

2016年8月23日星期二

食檸檬

真係好日唔發市,一發頂三年。
之前一直冇貓响花園出現,突然,呢隻疑似雄性嘅貓,久不久都响花園出現。
鄰居都留意到,話多咗見到佢。


成日周圍聞,唔通,佢聞到三色貓嘅氣味???
唔通,三色貓响出面收兵???
不過呢,三色貓已經絕育,所以,應該唔會發出可以交配嘅氣味。
這天,剛剛三色貓在家中午睡,我發現黃色貓响花園行來行去。
過咗一陣,佢消失咗。


又過咗一陣,佢返嚟啦,仲帶咗禮物添,唔知你睇唔睇到。


物輕情意重,好細隻。。。


然後,開始耐心等候,等女神出現。


三色貓終於醒咗,我唔知隻黃貓想點,於是同佢一齊出去花園。
黃貓似乎係果種好乖巧,冇乜攻擊性嘅貓,仲有少少傻氣添。
佢小心翼翼行近三色貓,三色貓就唔理佢,繼續留响我身邊。
呢個情景,擺明就係襄王有心,神女無夢啦。
過咗一陣,三色貓飲水,黃貓嘗試走近,用鼻掂三色貓嘅鼻,三色貓即刻用貓粗口叫佢死開!!
黃貓鍥而不捨,再試,今次,三色貓終於出手,兜巴星埋去。
黃貓跟住好慘慘貓咁嗚嗚叫,走開少少,等咗一陣見三色貓唔理佢,唯有走人。


王子回家,我將啲相同故事同佢分享,佢好驚訝,跟住哈哈大笑:估唔到,貓嘅溝女方法同人都係一樣,都係送禮請食飯,而貓女同好多女人一樣,唔like就兜巴車埋去。。。

24 則留言:

  1. 回覆
    1. 最搞笑係仲要俾佢粗口問候同兜巴星

      刪除
  2. 天啊!隻黃貓好可愛呀! 佢係咪有頸帶嘅呢?

    回覆刪除
    回覆
    1. 係呀,仲有個啷啷添,佢行路嘅時候有聲架,所以佢其實好叻仔,因為有啷啷仲要捉到老鼠,係難好多架

      刪除
  3. 黃貓的毛好靚呀,你地的貓識捉老鼠,好叻!

    回覆刪除
    回覆
    1. 黃貓係好叻仔呀,佢身上有啷啷仲要捉到老鼠,係難好多架

      刪除
  4. 唔好講話貓,我都曾見過兩隻狗為一隻狗女大獻殷勤,爭風呷醋,繼而「班狗」大打出手,最後輸了的那隻,哈哈…真的是夾著尾巴走呢!

    回覆刪除
    回覆
    1. 王子話如果三色貓無絕育嘅話,我哋呢排屋企花園會有一大批貓公等佢㗎

      刪除
  5. 禮物原來唔係畀你㗎!!

    回覆刪除
    回覆
    1. 哈哈哈,點解你同我家王子諗嘢一樣㗎,佢初頭真係以為黃貓係送畀我
      其實黃貓一早見到我,無行埋嚟,一見到三色貓,就立刻行近,好明顯囉

      刪除
  6. 咭咭咭!有趣!咁黃貓有冇拎番份禮物一齊走呀!

    回覆刪除
  7. 黃貓有頸圈而且貌甚企理清潔,應該都係附近的家貓吧

    回覆刪除
    回覆
    1. 應該係,但係佢好生面口,所以無人知佢邊家邊戶

      刪除
  8. 黃貓應該有人養架
    佢可能想同三色貓做朋友啫

    回覆刪除
    回覆
    1. 有頸圈,一定有人養啦
      我諗唔止做朋友咁簡單,呢排佢哋開始進入發情期呀

      刪除
  9. 哈哈哈哈,但係心碎黃貓好可憐呀。

    回覆刪除
    回覆
    1. 係呀,佢喊咗好耐,個心碎表情好慘呀

      刪除
  10. 回覆
    1. 係呀,不過都無用,三色女神唔吼佢

      刪除
  11. 哈哈哈, 都唔知猫係咁追女喎. 隻黃猫好靚仔吖, 三色女神仲咩咁對佢呀?

    回覆刪除
    回覆
    1. 我哋都唔知,真係第一次見咋
      哎,黃猫呢排成日嚟,三色女神依然唔so佢,次次被拒,就嗚嗚聲咁喊,感情呢樣嘢,人同動物一樣,都真係冇得迫

      刪除