我的網誌清單

2016年10月10日星期一

黃金萬兩

趁著天氣唔熱,涼涼地又無雨,係時候要搞個黃金萬兩日。
即係,又要去收集有機馬肥。
呢個馬場我哋之前都嚟過,距離我家唔遠,而且勁大,馬場跟森林貼在一起,農戶住在中間,兩面都係放馬嘅地方,大到睇唔到盡頭。


這是馬兒嘅其中一個住處,除咗佢哋自己本身養嘅馬,仲有啲係人哋養嘅馬,寄居在這裡,主人放假會嚟呢度照顧隻馬,同隻馬入森林散步,鍛鍊下騎術,清潔吓啲馬糞等等。
我哋到嘅時候,都有唔少馬主响度,泊車地方都滿晒,不少人正在低頭幫忙收拾馬糞呢。


其實嚟我家超近,都有一個馬場,無呢個咁大但係都唔算細,都可以攞到有機馬糞。
但係呢個地方最特別嘅地方,係園主已經將將馬糞堆好肥,新鮮嘅動物糞便不能立刻用作肥料,必須經過發酵腐熟、微生物分解嘅程序,先會變成肥料,而佢哋更加細心鋪上稻草,以免養分晌風吹日曬下流失。
近一點嘅係新鮮馬糞,遠一點黑色一大堆嘅,係已經堆好肥嘅有機肥料。
呢度係佢哋有嘅冰山一角,另一個地點,比這個堆肥處大好多,春天嘅時候,有機農夫就會嚟用拖車大量搬走,所以,我比較喜歡响秋天就去攞定先。



底部嘅肥料係最舊最好,園主都叫我哋攞呢部份,王子努力剷呀剷。
突然走出一隻小可愛來,八卦八卦。


個樣好靚啊,我同佢傾計,話俾佢聽我家有隻三色貓,同佢一樣咁乖巧咁可愛,問佢想唔想認識下,佢仲識得搖尾巴同發出聲響叫我呢。
王子就响隔離譏笑我,話我無啦啦同人講三色貓,仲叫隻馬同隻貓做朋友,九唔搭八。。。。


這次收穫不少,有23袋,或許,明年可以不用來也夠用啦。

20 則留言:

  1. 哈哈哈哈,真係好值錢㗎。

    回覆刪除
    回覆
    1. 如果去園藝中心買,真係唔平㗎

      刪除
  2. 小可愛八卦吓做乜有人喺度掘金.

    回覆刪除
    回覆
    1. 佢個樣真係好好奇,好似小朋友咁

      刪除
  3. 原來馬糞要堆完肥才用得,又增長了知識^^

    回覆刪除
    回覆
    1. 係呀,而且堆肥時間都幾長添呀

      刪除
  4. 你地會擺D黃金係邊, 我估一次用唔哂掛

    回覆刪除
    回覆
    1. 夠用一兩年唔會一次用哂啦,通常我會放車房

      刪除
  5. 王子好幫手! 我地的馬屎係已經包好唔使自己出手架。

    回覆刪除
    回覆
    1. 我記得你哋度好好會包埋,不過就係未堆肥嘅馬糞,我反而唔介意自己包,兩個人夾手夾腳其實好快搞掂,但係就唔想自己响屋企堆肥,同埋自己包嘅話,可以揀靚嘅嚟pack嘛

      刪除
  6. 已做好的有機肥料,咁要唔要俾錢買?

    回覆刪除
    回覆
    1. 呢度唔駛囉,但係出面買,已經風乾咗嘅有機肥,就好貴啦

      刪除
  7. 回覆
    1. 係呀,你都覺呀?個樣好靚好純呀,超鍾意佢呀

      刪除
  8. 堆好的有機肥仲有無味架?

    回覆刪除
    回覆
    1. 相對新鮮馬糞,個味會少咗好多好多,而且個樣無咁核突,開始似泥土嘅樣

      刪除
  9. 可能隻馬係搖尾(頭)嘆息..haha
    幾好, 物盡其用!不過出去買肥料都唔平, 雙臝!

    回覆刪除
    回覆
    1. 哈哈,可能係諗緊:萬物之靈,不過如此,唉。。。。。
      如果出去買,一有天然肥,有機肥呢啲字眼,就超貴,反而化肥就平到飛起

      刪除