意式烤蔬菜炆雞

屋企有啲Marinated Roasted Vegetables Antipasto剩下，佢將會有個好好嘅出路。
突然，好想食炆雞，但係想食西式嘅炆雞，用剩下嘅Antipasto，可以整到好好味好香濃嘅意式烤蔬菜炆雞。
屋企有隻法國粟米雞，先將佢斬件，用日本醬油，鹽，糖，黑椒碎醃1小時，加入2－3湯匙麵粉，拌勻，燒熱易潔鑊，加入少少油，放入雞件，中大火煎至金黃，反轉，再煎至另一面金黃。

加入食剩嘅Antipasto，幾塊月桂葉，番茄膏2湯匙，炒勻。

加入Antipasto剩下嘅醃汁（啲香草同蒜頭唔要），鹽，黑椒碎同少少辣椒碎。
此時，成個廚房香都不得了。
加蓋，用中火炆20分鐘，唔開蓋焗1小時左右，食前加熱，試味就可以。

各有各喜好，王子配麵糰，我配闊條麵。
Antipasto嘅蔬菜有烤過同醃過嘅香氣之餘，蔬菜收咗水亦會特別甜，加咗落去一齊煮，會令個醬汁好香濃，好有層次感，同用新鮮嘅蔬菜炆，係完全兩回事呢。
如果你自己冇整，去超市買一樽嚟煮都得㗎。