椰汁咖哩雞

平價超市賣嘅奧地利粟米雞真係超平，買過一次之後覺得性價比好好，只不過唔係經常有，要推廣嘅時候先有，而且每次貨源都好少。
碰上又有推廣，咁今次要入多啲貨啦。
琴日買咗兩隻，今日又買兩隻。
話就話係1400g，其實永遠都係有多無少，今次一隻係1600g，另一隻係1800g呢。
屋企得兩個人，一次煮一隻太多啦，返屋企，首先係將佢一開二，然後冷藏，每次用半隻雞，對我哋呢啲小家庭，足夠有餘。

今日先食半隻雞，將佢斬件，用鹽，日本醬油，糖，黑椒醃一小時。
將薯仔件半煎炸至金黃色，盛起。

倒出大部份油，加入洋蔥碎，薑蓉，中小火炒10分鐘。
加入蔬菜，炒10分鐘。

將2－3湯匙麵粉加入雞件內，拌勻。

撥開蔬菜，轉中大火，放入雞件，响雞件上面倒少少油。
煎到一面有啲焦黃，再煎另一面。

中間開個窿，放入印度香料／咖喱膽／咖喱粉，再响上面倒入兩湯匙油，略為炒炒啲香料，應該就會即刻聞到香味。
倒入水至剛剛蓋住材料，加入薯仔，鹽，少少黑椒碎，加蓋用中小火炆40分鐘，中間要攪拌吓，以免粘鍋。
完成後，唔開蓋，焗1小時以上。
食之前加熱，加入一罐小椰漿，試味。

是日獨沽一味，椰汁咖哩雞，配basmati。
一大鍋椰汁咖哩雞夠食兩餐，聽日可以偷懶唔使煮飯lu。。。