湯渣咖喱

中午時候，煲咗南瓜素湯，王子突然致電回家，問晚餐有乜嘢食，同佢講煲咗湯，加兩個餸，就夠啦。
佢突然話唔想食飯，想食烤餅，問我改唔改到，得嘅，咁變陣囉，於是就出現咗琴日寫嘅簡易乳酪烤餅。
咁本來啲餸又同烤餅唔夾，又要改改，望住啲湯渣，想想不如整個印度南瓜咖哩，配烤餅應該唔錯。

準備好印度香料，如果無，可以用現成嘅咖哩膽，或者淨係用咖哩粉都可以。

三隻細洋蔥，幾片薑，兩粒蒜頭，攪碎。

鑊內加入油，中火炒洋蔥15－20分鐘。

期間，可以將湯渣略略搞碎。

將洋蔥撥開一邊，加入多一點嘅油，再加入印度香料爆香。

加入湯渣，黑椒碎，鹽，炒勻 。

加入適量水份，加蓋（一定要加蓋，否則啲咖哩汁會飛濺），中火炆15－20分鐘，間中開一開蓋攪勻，以免黏鍋。
完成後不開蓋，焗一小時以上，食前再加熱。

是日晚餐係香煎德國腸伴印度南瓜咖哩，主食係乳酪烤餅。

烤餅好軟淋淋，口感係麵包同班戟嘅混合體，用來點咖哩食真係唔錯。
一個晚餐，已經無咗半盤嘅烤餅。。。