誤解

有好幾天，三色貓變得怪怪，唔係好肯食貓糧。
呢隻貓糧唔係新嘢，佢上一包明明食得好開心，仲好快食晒成包添。
搞乜鬼呢？？？？

起初，我同王子以為佢响外面捉到好多老鼠，所以唔食。
過咗一兩天，佢依然係咁，唔多掂啲貓糧，寧願夜麻麻，凍冰冰，都出去捉老鼠。
我又諗，佢係咪病咗呢？？不過，病咗無理由仲咁精神出街喎。。。
突然有一天，佢不斷走入廚房，向王子要零食，王子跟我說，佢大概係被寵壞，唔肯再食貓糧啦。
某天早上，仲頑皮到飛起，响啲零食邊跳來跳去，搞到我有點氣憤，無佢符。
傍晚，我終於忍唔住，倒咗佢啲貓糧，然後開包濕糧俾佢食。
佢彭彭聲咁食，明顯係勁肚餓！！！
原來，係貓糧嘅問題！！！我哋誤解咗佢！！！
我即刻覺得好心痛，原來佢係肚餓，究竟佢肚餓咗幾耐？！
跟住又立即開包新嘅乾糧比佢，又係彭彭聲咁食，仲要來來回回食咗幾次。
跟住又比零食佢，又係食得好開心。
一定係好肚餓啦。。。。。好慘慘貓啊。。。。
搞到我成晚好內疚，不停同王子講，覺得自己係失職嘅貓家長，王子唯有安慰我：我哋仲有比零食佢，而且佢識得捉老鼠，應該唔會太差。
食飽後，王子抱住佢溫馨咗好耐，不久，佢便開始進入夢鄉，回復平時好乖嘅樣。
大概，我仲係有好多嘢唔理解佢，下次，都係要小心啲。。。