糖醋排骨

呢排清雪櫃，成日整糖醋排骨，呢樣嘢，王子食極唔厭。
其實都好簡單，啱晒懶人，只係要少少耐性。
鍋內加入少少油，中火先爆香薑，再加入蒜頭，辣椒乾，肉桂條，炒炒。
我唔記得咗加月桂葉，後來加返。

加入1kg排骨，其實最好用腩排，不過我無，是但啦。
加入一大湯匙糖，炒炒。

放入半杯酒，三湯匙生抽，一湯匙老抽，加蓋，用中小火炆。
我用壓力煲，大概加壓15－20分鐘，如果你用普通煲／鑊，就要加多半杯水，加蓋，炆40分鐘左右。
跟住加入三湯匙醋，試味，開大火煮到收汁，就完成啦。
中間記得攪吓佢，免得黏鍋。

呢個餸好開胃，好好送飯㗎。
不過我家王子呢，都興係咁食肉唔食飯。。。。。。。