求仁得仁

我成日都覺得，王子係一個成日求仁得仁嘅人。
某天晚上，王子嘀咕嘀咕，說很久無食過牛扒。
係呀，你減肥吖嘛，仲要食少啲肉嘛，咪唔買囉。
隔天，真係如佢所願，我去超市時，見到美國牛扒有跳樓貨。
咁買定啲上吓倉啦，我好鍾意呢啲咁樣嘅獨立包裝，覺得好方便好企理，幾多人食就攞幾多塊出嚟解凍。

精心炮製嘅牛扒餐，塊牛扒勁大，有三分二仲係隱藏咗係下面，見唔到，攤開嘅話，係成隻碟咁大塊，不過就唔係好厚身，今日整咗紅酒磨菇汁，主食係德國麵糰。

我唔多想食肉，反而想食清淡啲，買咗魚比自己，整咗番茄蘑菇魚肉米線。

王子見到得一份牛扒，即刻好緊張，以為我食牛扒，佢食米線。
當我同佢講我唔想食肉，想食清淡啲嘅時侯，佢竟然偷笑出嚟，話好彩係咁，如果佢無牛排食，今晚一定好唔開心，最好以後我成日唔想食牛扒，咁佢就可以將屋企嘅牛扒全部食晒。。。。