火滾

是日，火滾。
八卦鄰居有隻狗，次次見到三色貓都發狂追佢。
其實隻狗都幾可愛，只係一見到貓同松鼠就發狂，追人九條街先安樂。
八卦鄰居係度都仲ok，可以喝止佢，但係有時係另一個鄰居個女幫手放狗，咁就麻煩啦，佢完全唔聽鄰居女支笛。
是日，我同三色貓一齊散步，鄰居女掛住自己玩，完全無留意周圍環境，狗狗突然出現响三色貓身後，立即瘋狂咁追三色貓，仲要追得好近，嚇到我心都離一離，三色貓最後唔知匿埋咗去邊。
鄰居女就响度發夢，最後，係我喝止隻狗繼續追，阿姐呀，隻狗唔係我㗎，點解由我去阻止佢呢。。。
呢個情況，其實已經發生過好幾次，我真係唔明，點解唔用狗繩呢？？？真係唔怕佢突然發狂？？？如果有事發生，有民事責任㗎，我見其他狗主都係一眼關七，好留意周圍情況，真係好肯定唔會出事先唔用狗繩，而且會唔俾隻狗亂嚟，見到有貓，又知道自己隻狗嘅脾性，會帶隻狗行遠啲，以免發生衝突。
我當時係極火滾，面色應該好難睇，但係都係壓住啲脾氣，忍住唔出聲，免傷和氣，況且，對方都只係一個青少年。

最後，我完全唔知三色貓去咗邊，搵咗好耐都搵唔到，平時我叫佢，佢一定返出嚟，今次可能好驚，打死唔出嚟。
突然覺得佢好慘。。。凍冰冰，唔知要匿埋幾耐。。。
王子回家後，見我面燶燶，立刻跟我一齊去搵，都係搵唔到，佢見我唔開心，唯有安慰我：三色貓好醒目，唔會有事，可能根本都唔當係一回事，依家唔知响邊度玩緊就真，狗好難捉到貓嘅，貓跑得快好多。。。

今次唔同呀，追得好近呀，如果隻狗追到三色貓，咁點算？？？
我唔理呀，今次可以算，但係再發生一定要出聲，免得真係出事。

等咗好多個鐘頭之後，佢終於出現返，若無其事咁，但係尾巴就多咗個傷口，仲流血添，搞到我同王子好肉痛，唔知係咪逃走時唔小心整親。
我唔理三七廿一，夜麻麻都撲出去超市買藥膏比佢搽，驚佢傷口發炎。
平安回來，食飽飽，搽咗藥膏，好好睡一覺吧。

過咗幾日，我同王子帶三色貓散步時，碰上鄰居女嘅媽媽，對方立即跟我們示好，大概知道發生咗事，自動投案，表示隻狗成日都係咁，佢哋有時都好苦惱，隻狗見到貓同松鼠就失控云云，原來，亦曾經有街坊同途人見到佢追松鼠同其他貓，望實佢哋，有啲仲忍唔住告誡佢哋小心隻狗，唔好傷到其他動物。

不過，自從呢次之後，鄰居女似乎醒目咗，次次放狗時，都會留意三色貓，或者我响唔响附近。。。