我的網誌清單

2016年10月11日星期二

火滾

是日,火滾。
八卦鄰居有隻狗,次次見到三色貓都發狂追佢。
其實隻狗都幾可愛,只係一見到貓同松鼠就發狂,追人九條街先安樂。
八卦鄰居係度都仲ok,可以喝止佢,但係有時係另一個鄰居個女幫手放狗,咁就麻煩啦,佢完全唔聽鄰居女支笛。
是日,我同三色貓一齊散步,鄰居女掛住自己玩,完全無留意周圍環境,狗狗突然出現响三色貓身後,立即瘋狂咁追三色貓,仲要追得好近,嚇到我心都離一離,三色貓最後唔知匿埋咗去邊。
鄰居女就响度發夢,最後,係我喝止隻狗繼續追,阿姐呀,隻狗唔係我㗎,點解由我去阻止佢呢。。。
呢個情況,其實已經發生過好幾次,我真係唔明,點解唔用狗繩呢???真係唔怕佢突然發狂???如果有事發生,有民事責任㗎,我見其他狗主都係一眼關七,好留意周圍情況,真係好肯定唔會出事先唔用狗繩,而且會唔俾隻狗亂嚟,見到有貓,又知道自己隻狗嘅脾性,會帶隻狗行遠啲,以免發生衝突。
我當時係極火滾,面色應該好難睇,但係都係壓住啲脾氣,忍住唔出聲,免傷和氣,況且,對方都只係一個青少年。




最後,我完全唔知三色貓去咗邊,搵咗好耐都搵唔到,平時我叫佢,佢一定返出嚟,今次可能好驚,打死唔出嚟。
突然覺得佢好慘。。。凍冰冰,唔知要匿埋幾耐。。。
王子回家後,見我面燶燶,立刻跟我一齊去搵,都係搵唔到,佢見我唔開心,唯有安慰我:三色貓好醒目,唔會有事,可能根本都唔當係一回事,依家唔知响邊度玩緊就真,狗好難捉到貓嘅,貓跑得快好多。。。

今次唔同呀,追得好近呀,如果隻狗追到三色貓,咁點算???
我唔理呀,今次可以算,但係再發生一定要出聲,免得真係出事。

等咗好多個鐘頭之後,佢終於出現返,若無其事咁,但係尾巴就多咗個傷口,仲流血添,搞到我同王子好肉痛,唔知係咪逃走時唔小心整親。
我唔理三七廿一,夜麻麻都撲出去超市買藥膏比佢搽,驚佢傷口發炎。
平安回來,食飽飽,搽咗藥膏,好好睡一覺吧。

過咗幾日,我同王子帶三色貓散步時,碰上鄰居女嘅媽媽,對方立即跟我們示好,大概知道發生咗事,自動投案,表示隻狗成日都係咁,佢哋有時都好苦惱,隻狗見到貓同松鼠就失控云云,原來,亦曾經有街坊同途人見到佢追松鼠同其他貓,望實佢哋,有啲仲忍唔住告誡佢哋小心隻狗,唔好傷到其他動物。

不過,自從呢次之後,鄰居女似乎醒目咗,次次放狗時,都會留意三色貓,或者我响唔响附近。。。

21 則留言:

  1. 好彩貓貓無事,如果唔係,一定唔肯過個主人。

    回覆刪除
    回覆
    1. 唉,我最怕三色貓有乜嘢損傷,或者有危險

      刪除
  2. 好彩貓貓無事,如果唔係,一定唔肯過個主人。

    回覆刪除
  3. 回覆
    1. 佢平平安安真係好重要,不過意外呢啲嘢一次就夠,如果再發生,我就要明言啦

      刪除
  4. 回覆
    1. 你講得啱!起碼佢意識到個危險性,不過如果再發生,我必定登門拜訪

      刪除
  5. 我想法有些似王子,因為在這邊很少見有狗狗追貓,就算有也不夠貓兒靈活,有時反而見到貓欺負狗狗呢!
    其實你也無需擔心,這會是增加貓貓的閲歷、經驗和膽識!

    回覆刪除
    回覆
    1. 唉,我真係唔使佢有閲歷、經驗和膽識,但求佢平平安安,身體健康,於願足矣

      刪除
  6. 回覆
    1. 其實我响屋企都成日聽到佢哋鬧隻狗唔聽話,睇嚟佢服從性真係差啲

      刪除
  7. 係咪可以教到啲狗狗唔追小動物嘅呢?

    回覆刪除
    回覆
    1. 要睇隻狗同放狗人嘅關係,係咪有好強服從性囉,但係一般狗主如果知道自己隻狗唔係咁聽話,通常會用狗繩,直到去到好安全嘅地方,先會比隻狗自己行或者跑,因為出事嘅話,個賠償額唔少嘢㗎

      刪除
  8. 明知自己隻狗會追(嚇!)其他小動物都唔用繩,真係好唔負責任﹗

    回覆刪除
    回覆
    1. 咪係囉,所以我先咁火滾,其他狗主唔係咁㗎,佢仲係我哋鄰居,話佢又大家冇癮,有啲嘢,應該唔駛人哋講,自己識得自律㗎嘛

      刪除
  9. 三色貓好彩有妳這個咁愛佢嘅'主人' XDXD,幸福幸福 <3 <3/

    回覆刪除
    回覆
    1. 真係好難唔愛錫佢,超可愛又好似小朋友咁。。。

      刪除
  10. 都無計,唯有下次見親佢都有咁遠避咁遠:P

    回覆刪除
    回覆
    1. 因為好多時三色貓係自己出街,我怕有一日佢會比狗狗捉到,如果再發生上述事件嘅話,就要同鄰居講清楚,畢竟,唔應該係三色貓或者其他動物不斷避開隻狗,應該係個主人好好控制隻狗,令隻狗唔好危害其他動物

      刪除