我的網誌清單

2014年7月16日星期三

糯米雞

糯米雞係我大愛,無奈王子唔鐘荷葉陣味,我只會整俾自己食。
久唔久我會整一次,一次過整多啲,可以留啲响冰格慢慢食,做一人前午餐。
600g糯米大約可以整到4隻糯米雞。
糯米洗淨浸水6小時以上,拌入鹽(600g糯米約1茶匙鹽),再蒸熟或者用電飯煲煮熟,至於要加幾多水煮糯米,就要視乎隻糯米有幾硬啦,一般係蓋過米面至米面半cm水左右,糯米唔使煮至跳掣,收水就可以熄掣再焗5分鐘完就可以。


至於個餡就好個人啦,曾經看過一篇文章,說糯米雞是源自隔夜餸,為免浪費,酒樓會用汁煮下啲隔夜餸再包成糯米雞。
冬菇、蝦米、木耳、粟米芯、火腿、雞件、蟹柳、銀杏、滑子菇.....喜歡乜就落乜啦。
個汁都係蒜茸 、海鮮醬、蠔油、生抽、老抽、麻油同水煮成,試味,再用生粉水打芡。
因為糯米只有少少咸味,個汁要略重味呢。

荷葉用熱水煮一煮至軟身,視乎荷葉大小再剪成2-3塊。

如果你鐘意,可以在荷葉上掃少少油先包,不過我冇。
一 層糯米,一 層餸。

一 層汁。

再一 層糯米。

兩面對摺再捲起,隔水蒸20分鐘便成。

加一杯茶,便是我喜愛的午餐了!


21 則留言:

  1. 仲係香港時, 我間中都會買糯米雞做早餐, 特別係開OT開到飛起, 要食D高熱量嘅野打打氣 ^^

    回覆刪除
    回覆
    1. 我呢個係低熱量糯米雞黎架,街買啲糯米雞放咗大量油,同埋用咗咸蛋黃、腩肉做餡,所以高熱量呀

      刪除
  2. 荷葉陣味咁香今次王子唔識貨喎.

    回覆刪除
    回覆
    1. 佢叫我整糯米雞唔好用荷葉喎,塊荷葉係靈魂,唔用仲係咪糯米雞?!

      刪除
  3. 嘩,你好識歎呀!王子走寶啦!荷葉係中超買的嗎?

    回覆刪除
    回覆
    1. 荷葉大啲嘅中超有架,仲幾平tim! 你有冇買過?

      刪除
    2. 我好少見有荷葉賣, 糭葉就有. 我留意吓, 因為我都想買黎做糯米雞.

      刪除
  4. 呢幾年都少咗食糯米雞

    回覆刪除
    回覆
    1. 糯米雞易頂胃,我有啲朋友都唔食架

      刪除
  5. 我做法仲慳水慳力,首先也是蒸糯米,蒸得三十分鐘左右,再加餡料(有少少汁)撈混,然後蒸多半個小時。
    這樣沒荷葉的有料糯米飯,也同糯米雞食法差不多。

    回覆刪除
    回覆
    1. 我隻糯米好怪,蒸三十分鐘都唔熟,所以我要加水用電飯煲煮,不過電飯煲有樣好:快。

      刪除
  6. 咁你有無整多份唔包荷葉既俾王子食呀?

    回覆刪除
    回覆
    1. 無呀,我覺得塊荷葉係靈魂,冇咗有啲怪呀

      刪除
  7. 糯米雞也是我的至愛﹗ :D 家中的糯米一直未發巿,等我找到荷菜也來試包一下﹗

    回覆刪除
    回覆
    1. 其實呢個易整架,一次仲可以整多啲,留啲响冰格慢慢食

      刪除