我的網誌清單

2014年7月3日星期四

留尼旺 -種植雲尼拿

上次去唔成雲尼拿種植場,是日又再去。
途經大型市集,那有過門而不入去八之道理?


本地人真實生活寫照。

留尼旺超流行食迷你菠蘿,特別香又無渣。

留尼旺好古怪,四面環海但係海產唔平架。

每一個市集必定有雲尼拿賣,價錢相若。

佢哋會咁樣處理啲生嘅大樹菠蘿,然後再裝入類似金寶湯嘅罐入面,買賣單位就以罐計,佢哋原來可以用黎整好多唔同餸、小食架!



去完市集,下一站係雲尼拿種植場。
每小時有一次導賞團,見未夠鐘,就睇下啲副產品先!
整個環境充斥住雲尼拿嘅香氣!



個雲尼拿種植場好隱敝,點解呢?因為佢貴囉,雲尼拿係繼藏紅花之後,最貴嘅香料。
財不可以露眼呀!雖然唔係成日發生,但係真係試過有雲尼拿農民嘅雲尼拿一夜間俾人偷摘哂!
其實呢個種植場唔大,主要係用黎做實驗同導賞架。

呢啲就係雲尼拿真身啦。
雲尼拿源自墨西哥,屬於蘭花家族。當時仲係用蜜蜂授粉,後來雲尼拿果被法國人偷運到留尼旺及毛里裘斯試種,但係啲蜜蜂唔習慣移民後嘅生活,瓜哂。
冇咗蜜蜂授粉,種到花都冇用。1841年一個叫Edmond Albius嘅12歲奴隸發現咗人手授粉嘅方法,就係因為佢,雲尼拿嘅種植响留尼旺發揚光大,呢種技術再傳到附近其他地區。直至1898,馬達加斯加、留尼旺同Comoros Islands就佔咗全球80%雲尼拿產量。
咁點解人手授粉咁重要呢?因為雲尼拿花只開花數小時,要响呢幾個鐘內把握時間用手逐朵逐朵授粉先得!
每年11月至2月係留尼旺雲尼拿開花嘅時候, 啲工人好忙架!
授粉成功之後,再等6個月左右雲尼拿條就會成熟。
因為開花嘅時候唔一樣,亦要靠人手去檢察雲尼拿條是否成熟。
原來雲尼拿成熟時,唔係會散發出雲尼拿味,而係茉莉花香味!
而佢哋亦研究點樣將其他植物嘅香氣同雲尼拿融合,例如將茘枝枝葉埋在泥內同雲尼拿一齊種,咁雲尼拿亦會帶有少少茘枝香味,十分有趣呢!

因為雲尼拿貴,要用手逐枝逐枝打個名上去,避免俾人偷咗都冇得拗!

成熟咗嘅雲尼拿會先用水煮一煮。

跟住趁熱包被再入木箱兩日。

跟住再曬幾日。



然後再响室內慢慢乾幾星期。

然後再入木箱焗1年。
所以1支雲尼拿要用上兩年時間先生產到!

個種植場唔大,因為佢哋可以同農民買雲尼拿黎加工。

唔同農民嘅雲尼拿放唔同位,咁將來就知產品質素如何。

然後再逐枝逐枝度長度、分類同檢查有冇爆開。




據說呢個係新產品,亦係全球最貴雲尼拿。
因為佢冇經過煮嘅過程,而佢亦會產生雲尼拿結晶,好似比較細嘅海鹽咁(影唔到呀!),所以香味非常純正同強!生產技術仲係一個秘密。

人手授粉嘅圖解。



雲尼拿種植場非常有趣,好值得睇呢!

21 則留言:

  1. 細個時以為雲尼拿係雪糕!!!! 大了知道不是, 直至幾年前學餅才見過它的真身雲尼拿條. 看你的介紹, 真是很有趣啊! 我在香港買到的雲尼拿條, 比較經濟的是十元一條, 是在學烹飪的地方買, 算是很便宜, 其餘地方應要十三, 四元一條, 感覺又不是很貴. 不過, 我又記起以前玩FB中一個CAFE的遊戲, 好像答過一條問題, 題目就是問提供的幾種香料中, 哪種是最貴的香料, 而玩了幾次後, 我就知道答案是雲尼拿. 當時不求甚解, 現在明白它要如此人工授粉, 又要經歷這麼多工序才投入市場, 終於明白它貴在哪兒了. 真是要多謝你啊!

    回覆刪除
    回覆
    1. 哈哈.....我細個時都唔知雲尼拿係香料,一直以為係一個無意思嘅名。
      不過我真係估唔到要成兩年時間呢,同埋雲尼拿個品質差距可以好大,所以價錢差距都大架。

      刪除
  2. 好detail呀. 我可以學到o野.

    回覆刪除
    回覆
    1. hehe...呢篇好多資料,寫咗我好耐呀

      刪除
  3. 我成日都覺得雲呢拿好貴, 所以要慳住用 ^^

    回覆刪除
    回覆
    1. 咦!我有啲分享bor: 聖誕前我度啲超市會大手入雲呢拿,到咗1月佢哋會以超低價清貨,今年我見幾間超市都係用3、4折清貨,可能你度都有架。反正雲呢拿可以保存好多年,見平可以入貨呢。

      刪除
  4. 解釋得好詳細,又學到野

    回覆刪除
    回覆
    1. 呢度學到野架,個topic仲好有趣。

      刪除
  5. 原來雲尼拿真身係咁嘅,多謝你介紹

    回覆刪除
    回覆
    1. 種植雲尼拿好有趣,好值得睇架

      刪除
  6. 你寫得十分詳細,原來係咁貴的香料....
    而家有些香薰也加了云呢拿味,又或云呢拿味加入其它水果香氣,味道便不單一了......

    回覆刪除
    回覆
    1. 據說雲尼拿同好多水果香氣都夾架,咁就叫做有啲新產品lor

      刪除
  7. 原來雲哩嗱咁多功夫嚟加工, 唔怪得咁貴啦.

    回覆刪除
    回覆
    1. 我以前一直以為係難種,原來係多功夫同長時間

      刪除
  8. 原來雲呢拿生長喺咁煩覆,唔怪得咁貴!

    回覆刪除
  9. no wonder it is so expensive, thanks for sharing, so interesting !

    回覆刪除
  10. 好有趣既經驗!估唔到要兩年先收成, 估唔到咁容易買到既野係咁矜貴!

    回覆刪除
    回覆
    1. 所以啲生產國都比較窮,人工低先做到架

      刪除