A貨炸雞餐

早上去超市，見到盒跳樓貨雞脾，勁平。
心裡面，突然間好想念炸雞叔叔嘅出品。
我哋好少炸雞叔叔嘅分店，城嘅內內外外，加埋都係得幾間，而且價錢都頗高昂，最近我家嘅，要揸車35分鐘先到。
其實A貨一啲都唔難整，而且用嘅時間其實好短，咁我開工啦。

雞脾斬件，加入喜歡嘅香料粉，黑椒碎，鹽，醃兩小時以上。
一個大碗內放入麵粉，加入香料粉，黑椒碎，鹽，拌勻。
另外一個大碗，準備蛋液。
先將雞件沾滿麵粉，在放入蛋液中，沾滿後，再放入麵粉內，沾滿後，放入一隻大碗內。
將所有雞件準備好後，等大約半小時，然後用中大火炸至金黃同熟就可以啦。
剛剛開始炸嘅時候，千萬別翻動雞件，以免破壞表面嘅麵漿，等麵漿硬起來才翻動，就會炸得靚。
A貨都好似樣，係咪？？

王子之前執返嚟嘅薯仔仲未食晒，反正炸開嘢，整埋薯條先得。
薯條切好，用水浸一小時以上，中間換幾次水。
瀝乾水，用布／廚紙抹乾水。
燒熱油，用中火炸8－10分鐘左右，取出。
然後再轉中大火炸雞。
雞件炸好後，加入薯條用中大火炸多幾分鐘，盛起，放入少少鹽撈勻就完成，咁樣炸出嚟嘅薯條，先會外脆內軟㗎。

A貨A到底，我仲準備咗coleslaw，用攪拌機將椰菜，甘筍搞碎，倒出，加入鹽，黑椒碎，少少淺色嘅醋（蘋果醋之類），沙律醬，少少牛奶，拌勻，試味，放入雪櫃醃幾小時以上就可以，有時間可以醃過夜，仲好味添。
今日有三個醬汁，沙律醬，泰國雞醬，美式BBQ醬，用嚟點雞同點薯條食。

唔講唔知，其實，我家王子係未食過正貨家鄉雞㗎。。。