藜麥香菇滑雞煲仔飯

以前煮飯，久不久都會加入糙米，但係仲係覺得準備工夫多，有啲煩，又唔係咁好食。
依家呢，就鍾意用其他有益嘅穀物代替，好似呢個藜麥飯，我真心覺得唔錯，方便又少功夫，無怪味又唔硬。
藜麥呢種super food其實已經响洋人世界大熱咗好一段日子，最初價格高昂，依家已經平民化咗好多。
天氣凍，我今日用嚟整藜麥香菇滑雞煲仔飯。
將幾湯匙藜麥沖沖水，加入浸香菇水，少少清水，中小火，加蓋煮大約8－10分鐘。

佢會變咗半透明。
跟住加入米（米要先浸一小時以上）同適量水，用中大火煮到開始收水。

將已經醃好嘅香菇雞放入，加蓋轉中火煮三分鐘，再轉中小火煮多十至十二分鐘，視乎雞件有幾大。
唔開蓋，焗五至十分鐘就可以啦。
今日係用奧地利粟米雞整，雞肉特別彈牙好食，而且雞皮係帶微黃同彈牙嘅。
除咗香菇，我仲放咗雲耳同蟲草花，增加營養價值。

加入甜豉油就搞掂，加多個北方嘅辣白菜，開飯喇。