妒忌

三色貓，每日都要坐過我大髀幾次先安樂，其實我都幾怕佢啲爪，所以永遠都要鋪好毛巾先比佢上嚟坐。
如果唔比佢坐呢，就會嗚嗚嗚咁喊，好似我辜負咗佢咁。

最近，王子抱怨，三色貓淨係黐實我，唔多睬佢。
唉，好明顯，王子有啲妒忌囉，咁都冇計㗎，佢同我相處時間多呀嘛。
咁我就製造多啲機會比佢兩個獨處啦，有幾次，明明王子幫緊佢按摩，咁我就悄悄走開，做下其他嘢，點知三色貓一發現我走開咗，即刻追住我，要搵番我，王子嘛，頓時好冇癮，覺得自己做咗鍾無艷。
我有幾次同三色貓講，你乖啦，去佢度啦，佢好想抱你呀，你唔好唔睬佢啦。
三色貓，梗係睬我都戇居，繼續順從自己意願。
還好，這小鬼，偶然都會俾啲甜頭王子，突然間，都係會伏在王子大髀上，擺出一個溫柔可愛嘅貓樣，搞到王子之前嘅不快都一掃而空。
這一晚，佢主動同王子溫馨一番，仲用鼻子同王子kiss kiss，搞到王子好心甜。