酸菜魚米線

早上去超市，見到有包鰈魚柳減價，反正未決定食乜嘢做晚餐，就佢啦。

今晚我哋食酸菜魚米線。
先將魚切片，用鹽，魚露，白胡椒粉，少少糖，醃醃。
花椒用少少油，中火煎一陣，等花椒味導入油之後，將花椒盛起，唔要。

跟住加入薑片煎一煎，再加入蒜頭同辣椒乾，炒到有香味，加入酸菜，用中大火找出酸香味出嚟。
本來我想買用kale整成嘅酸菜，不過買唔到，咁用呢隻白椰菜整成嘅酸菜啦。
如果你無，用中式鹹酸菜，泰國咸酸菜，都可以。

我嘅辣椒乾唔夠辣，但係我想食辣，所以我另外加咗啲辣椒碎。

跟住加入雞湯／魚湯，煮5－8分鐘。

加入魚片，已煮熟嘅米線，煮到滾起，試味，睇下需唔需要再加鹽，就可以啦。

灑上少少蔥花，就係我哋嘅簡易川式晚餐啦。