洋蔥雞翼飯

某一天晚上，王子講唔實，會唔會返屋企食晚飯。
我最憎最憎最憎就係呢啲情況，都唔知使唔使預佢，又唔知要預幾多。
試過預佢食呢，佢分分鐘又話唔肚餓，搞到食唔晒。
唔預佢呢，又試過佢見到我食，大叫肚餓，又要食埋一份，最後，我食唔飽，又要再煮嘢食，真係搵嚟搞。。。

反正都係估佢唔到，我唔理啦，煮自己鍾意食嘅嘢就算。
今日突然好懷念茶餐廳嘅出品，好想仿製出來，扮到有咁似樣得咁似樣。
是日快餐：整洋蔥雞翼飯，配熱咖啡。
煮完之後，廚房嘅氣味，真係好似茶餐廳嘅氣味，令人好懷念啊。
呢一刻，唔知你最想食嘅碟頭飯，又係乜呢？？？