羊肉腸仔煎飽

雖然我哋係腸仔國，但係見到嘅腸，通常係豬肉，牛肉，雞肉，同火雞肉。
由羊肉同鴨肉做嘅腸其實好好味，不過好少見。
是日突然見到有羊肉腸，買咗。
打開包裝，立刻一陣羊臊味湧出嚟，正呀。

我知很多人都接受唔到羊臊味，但係我同王子就好鍾意，覺得如果冇羊臊味，不如食其他肉啦。
今日我打算整羊肉腸仔煎飽。
4－5湯匙麵粉，加入大半杯暖水，少少酵母，攪拌至見唔到粉粒，放大約兩小時。

跟住加入約5湯匙麵粉，攪拌，然後開始用手搓面，麵糰太濕可以加一湯匙麵粉，太乾可以加點水，但係唔好一次加太多，每次加少少，搓勻唔夠先再加。
搓成麵糰後，蓋上布等15分鐘。

跟住分開等分，壓平，包入腸仔，放上已掃油嘅易潔鑊內。
中間同上方都要留點空間，唔好太迫，佢會發大㗎。

用中火煎到聽到啪啪聲之後，等一分鐘，加入半杯水，加蓋。
水收乾之後，將火調細一點，煎多5－7分鐘左右就可以啦。

是日晚餐，羊肉腸仔煎飽。
仲有兩個涼菜：花生醬涼拌車喱茄，辣白菜。
羊肉腸個味係掂嘅，王子嚷著要再入貨。。。