魚露炸雞

突然好想好想食炸雞。
屋企買咗咁多粟米雞，即刻解凍半隻先！！！

炸雞比較熱氣，整番個乳酪拌青瓜，中和吓。

淨係青瓜唔夠蔬菜，咁整多個黑椒炒雜菜啦。

今日嘅主菜係魚露炸雞，將雞斬件，細件啲會快啲入味同唔晒炸咁耐。
用魚露，少少鹽，糖，黑椒醃半小時以上，上粉（用麵粉，生粉，蕃薯粉都得），大火炸到金黃就可以。
但係炸全雞其實係有次序嘅，應該先炸雞翼，雞髀同有骨嘅，呢啲位比較難熟但係唔易炸到鞋熠熠，見到有骨位有血出，再等多一陣，見到血水變成深色，先再加入淨肉位置（通常係雞胸）一齊炸，淨肉位置好易熟，但係又容易炸到鞋熠熠，炸嘅時間唔應該太長。
次序啱，炸出嚟嘅雞先會唔鞋熠熠而且夠熟呢。
點泰國雞醬食，兩個人食晒成碟雞。。。