上車盤

星期日，好好太陽又好暖笠笠，亦係三色貓正式成為業主嘅大喜日子！！

佢個上車盤，基本上係用我哋收集返嚟嘅廢材建成嘅，四隻腳係從一張舊餐檯嘅切割出嚟。

屋身係實木，原身係釘在牆身上嘅木材，木材有兩層，中間鑲入咗一層保暖物質，所以多咗好多功夫，但係就會舒服好多。

其實屋身好快就搞掂咗。 屋頂就麻煩啦，等咗好耐都等唔到合適嘅廢材，終於响一個落雨天，我哋响屋企附近發現有大裝修，找到一塊大鋁板，但係要自己切割同將佢扭曲成合適嘅形狀，再將佢同一塊木板鑲嵌好，可惜我哋工具唔夠，等咗好耐先借到工具，勉強整成，本來如果有王子想要嘅工具，會做得更加靚，但係無人有，咁唯有退而求其次啦。

每個物料都要多次塗上保護漆同油漆，確保佢唔滲水，呢啲物料，都係我哋之前用剩嘅。

門口係唯一買嘅貓門，天氣凍時，可以將膠板裝上，咁三色貓就可以自由出入之餘，唔會比啲冷風吹親。裡面呢，我已經幫佢鋪好厚厚嘅毛氈。

夏天嘅話，佢可以响入面避雨，亦可跳上屋頂曬太陽。

我哋攪間屋時，新業主响附近曬太陽。
王子就一直嘀咕著，說放咗咁多心機，如果佢唔肯用，佢會好失望囉。
我連忙安慰佢，或者應該諗，我哋盡咗照顧佢嘅責任，等佢唔使淋雨吹風，佢喜唔喜歡用，就由佢揸主意啦。

後記：新業主响第二日中午已經開始入屋巡視啦，我連忙通知王子呢個發展商，佢開心不已呢。