杞子蟲草花雞肉蕎麥烏冬

今年嘅第一場初雪，突然嚟咗，外面氣溫驟降。
過往都係十一月底先有第一場雪，今年早咗好多呀。

買咗包蕎麥粉，打算整蕎麥烏冬。
好多人以為，整蕎麥麵或者蕎麥烏冬，要用足100%蕎麥粉，其實完全唔係，係雖要混合麵粉先做到呢。
我今次用嘅比例係40%蕎麥粉，20%高筋麵粉，40%中筋麵粉。
用機器整，一陣就整好一大盤，分開兩餐食。

雞件我一早用蠔油，豉油，糖，鹽，白胡椒粉，在加入雲耳，蟲草花，切碎咗嘅冬菇同姬松茸，一齊醃。

蕎麥烏冬先煮熟，跟住過冷河三次，期間要用手搓一搓啲麵，去除表面多餘嘅澱粉質，咁做出嚟嘅烏冬就唔會糊口，會爽口好多。
因為蕎麥嘅緣故，煮麵水都係灰灰哋色㗎。

跟住煮湯。
先用少少油，炸啲薑片至焦黃。

跟住加入雞件，皮向下，煎到一面金黃，反轉，加入蟲草花，雲耳，冬菇同姬松茸，炒炒。

倒入數湯匙嘅紹興酒，再倒入熱水，加入魚露，豉油，鹽，少少糖，煮成雞湯。
當然，你唔用水，用雞湯煮，都一樣得啦。
雞件熟之後，加入杞子煮一分鐘，再加入蕎麥烏冬，煮滾，試味。

外面凍冰冰，食碗熱辣辣嘅烏冬就最好啦。
呢個食物比較養生，難得係王子好鍾意食，冬天會多啲整嚟食。
蕎麥烏冬好好味，而且有益，應王子要求，我以後會多啲製作。