我的網誌清單

2016年11月3日星期四

公眾假期

聖誕節前嘅最後一個公眾假期,終於都渡過咗啦。
假期在星期二,又是在萬聖節後,王子攞咗一日假,就可以有四日連假。
最後一日嘅假期,王子唔知乜事,瞓到十二點都唔起身。
我早佢好多已經醒咗,先同三色貓公主跪安,幫佢按摩,跟住做咗一堆家務,王子仲係未起身。
如果聽日仲有假期,就無所謂,可以任佢瞓覺,但係聽日要早起返工,就唔得啦,瞓到咁晏,即係今晚有人會瞓唔著,典床典蓆,聽朝鑊鏟鏟都唔起身,返工個精神狀態又似喪屍。


啱啱諗住叫醒佢,佢就醒咗,唔係因為瞓夠,係因為肚餓喎。
即係叫我快啲煮午餐囉。
假期前係星期一,王子經過大超市,幫我睇下有無跳樓貨,真係有喎,仲係青口添,即買!
好快手整咗個蒜香蔬菜番茄汁,將蒜蓉炒香,加入喜歡嘅蔬菜,少少番茄,夠腍之後加入少少黑椒,加入青口煮至開口,加入已煮熟嘅意大利麵煮多一分鐘,試味,熄火等一分鐘,等啲海鮮味滲入意大利麵就完成啦,因為意大利麵嘅份量相對青口少,所以鹽都唔使落,而且好鮮味呢。

用嘅時間,只係比煮方便麵多少少,而且無添加但係又有鮮味,係我我鐘意嘅食法。

呢晚,果然有人瞓唔著,典來典去。。。第二日放工返屋企,個樣比萬聖節啲喪屍更喪屍。。。

18 則留言:

  1. 可能平時王子做野太辛苦, 好攰啫

    回覆刪除
    回覆
    1. 已經係假期最後一日,同做野太辛苦無關係啦

      刪除
  2. 你哋之前行咗咁耐實攰啦!瞓得晏唔出奇喎!

    回覆刪除
  3. 放工返屋企,個樣比萬聖節啲喪屍更喪屍。。。哈哈,咁咪早啦瞓囉

    回覆刪除
  4. 回覆
    1. 但係私人年假多喎,拉上補下啦

      刪除
  5. 我度都好多人都攞一日假變四連休.

    回覆刪除
    回覆
    1. 我哋係家長多,因為撞正study week

      刪除
  6. 我一看到公眾假期就特別開心 XDDD

    回覆刪除
    回覆
    1. 哈哈,係咪放假之前一日已經唔想返工??holiday mood高昂??

      刪除
  7. 其實都唔關事,返工人人都似喪屍啦XXXXD

    回覆刪除
    回覆
    1. 哈哈哈。。。世事都被你看透!!!

      刪除
  8. 我好鐘意呢句呢~~第二日放工返屋企,個樣比萬聖節啲喪屍更喪屍~~ 哈...

    回覆刪除
    回覆
    1. 袁生係咪周不時都係咁架??

      刪除
    2. 佢幾年前由打工轉左自由身,係屋企畫圖,所以都冇咩喪屍唔喪屍既,不過就晚晚超夜先訓,朝早唔願起身個隻囉

      刪除