唔浪費

整完片皮鴨，又起埋啲肉做鴨鬆，剩下鴨骨。
屋企從小到大都係咁，鴨骨唔會丟，會用嚟煲湯同煲粥。
鴨骨加入清水同幾片薑，用壓力煲將佢煲成鴨湯，份量都唔少，可以分開幾次用啦。

是日王子在家午膳，外面又風又有雨，打算做個清清地嘅湯烏冬。
今次依然係做蕎麥烏冬，先煮熟，再過冷河三次。
鑊內加入兩片薑，少少油煎薑片至焦黃，加入已浸泡好嘅雲耳同蟲草花炒炒，加入紹菜炒炒，放入一湯匙嘅紹興酒，加入鴨高湯，鹽，糖及少少生抽，加蓋煮幾分鐘，加入杞子，煮多一兩分鐘，加入烏冬煮滾，試味，就完成啦。
清清地嘅食物，感覺天然有益。