博物館之夜（11）

下一站，我哋去睇新王宮。

門口有古董車展，仲有啲以前嘅校巴，消防車，救護車等等，好好睇，不過好暗好難影相。

呢個新王宮打仗時炸到面目全非，依家見到係重建嘅。

依家新王宮係政府嘅財務同社會經濟部嘅辦公室，入面靚架，仲好優雅添，入面有啲古裝人響度搞下氣氛。

仲有豎琴演奏。

啲古裝人唔係響度吹水閒聊㗎，聽講佢哋係演員嚟㗎，所以會模仿以前古代人嘅姿態同談吐。

 古董傢俬，貼晒牌，叫人唔好掂。

領導嘅辦公室。

呢度有一間間房，部分可以出租。

呢間王子嚟過，有同事選擇唔响教堂結婚，租咗呢度行禮，係咪好童話式婚禮呢？

其實呢間房好靚，啲水晶燈都好靚，不過我影唔到佢嘅美麗。

牆上幅畫好似有名堂嘅，不過我無研究。

咁多人圍住，原來有講解。
估下張凳仔有乜咁特別。。。

呢張其實唔係一般凳仔，係poopoo凳，以前啲貴族好優雅嘛，唔想俾人知佢響度poopoo（或者想人以為佢唔會poopoo），而且啲衣飾又唔方便去poopoo，咁想poopoo時就要鈴叫僕人擔張poopoo凳，張凳可以打開，中間係馬桶，搞掂就叫僕人攞走。。。

最後呢間房應該係最靚啦，有個靚靚天花。