新舊交替

上星期天氣好好，見到小菜園嘅新舊交替，真係睇到人心花怒放。

呢種豆係去年10月落種嘅，係一種可以捱到風雪同負20度嘅品種，二月份嘅時候佢會感應到季節嘅轉變，然後自動發芽，最近啲花開得極燦爛，一大片，都幾靚㗎。
希望佢哋快啲結出豆來，我想食新鮮豆啊。

 旁邊嘅仲有啲黃花，呢啲好快要比我清除，不過見佢哋幾靚，暫時留響度裝飾吓小菜園。

沙律開始長大啦，我種咗好多，下個星期應該可以開始供應餐桌嘅需要。

仲有各類嘅香草，莞茜係其中一種。

亦有已經開花想結種子嘅植物，呢棵係羊萵苣（nut lettuce），非常耐寒，所以冬天時種咗好多用嚟做沙律，四月份嘅時候佢哋突然長高，開出白中帶一點點紫色嘅小花來，第一次見，好靚呢。

新種嘅仲有西洋菜，種植佢哋都遇上幾次嘅破壞，就係九九九誰是兇手幹嘅好事，不過經過修復同保護，佢哋開始漸入佳境。

仲有basil，我係由種子用有機方法培育嘅，之前經歷過唔少失敗，今年開始成功啦。

呢個又係另一個成功，係綠蘇green shiso，今年終於第一次由種子培育成功，依家仲係生長中，佢哋似乎好快樂啊。
我很喜歡綠蘇嘅味道，久不久就會摘幾塊葉嚟食，真係好香呢。

Borage真係唔錯，上年春天種咗一次，夏天第一批開花後死去，同時又自己掉下種子，再長出新一批出來，直到冬天先死去，今年春天，又生出來，完全唔使理佢。

還有牛蒡，二月尾開始種，今次試吓用袋種，直接剪開泥土袋，施啲肥就種，睇吓效果如何。