新鍋

以前一直唔敢用壓力煲，由初初好怕有意外，到買咗之後，發現原來好好用，一啲都唔危險。我講唔危險，係要買啲新科技，商譽好嘅牌子，老老實實，如果平，但係個技術差，平極都唔會買，費事有乜意外。
用咗好幾年，依家已經用到無咗佢唔得，煲湯煲粥煲湯水炆嘢燉嘢蒸糕蒸餸翻熱，都係佢。
年幾前開始覺得一個唔夠用，煲到湯時又炆唔到嘢。
原因係，我唔鍾意幫佢排壓，我鍾意佢自然排壓，咁樣可以透過餘溫煮食，慳能源嘅同時，壓力煲個膠圈會襟用啲，煮食效果亦好啲。
一直留意住想要多個，不過我已經有一個大嘅不銹鋼，所以想試下買下面呢一種。
等咗好耐，終於等到心水價，即刻買。
拿拿拿，我唔係賣廣告㗎，我真金白銀俾錢買㗎。

佢最大嘅特色係唔用不銹鋼，用咗專利嘅Silargan（希拉鋼，係一種將陶瓷同不銹鋼合而為一嘅技術），所以可以直接响個煲內煎煮，而且傳熱同保溫都比不銹鋼好，而且個物料好堅硬，唔易刮花，又易清潔，有30年保養，適合用來炆食物。
佢嘅物料比較細密，所以對抗菌同保持食物原味嘅效果會好啲。
不過價錢當然唔簡單啦，今次係超筍價，先捨得買咋。