再挑戰，懶人版自製麵筋

之前整咗一次懶人版自製麵筋，已經對麩質蛋白粉（vital wheat gluten flour）呢個產品好滿意，但係做出嚟嘅齋比我平時食開嘅，硬咗啲啲，今日用另一個方法整。
今次一次過做兩個實驗。
兩邊都係300g麩質蛋白粉+50g普通麵粉，兩盤粉首先拌勻，要將兩種唔同嘅粉徹底結合在一起。一盤係用普通暖水逐少逐少加，直到麵糰唔再吸水，再搓幾分鐘，蓋上布，等30分鐘。
30分鐘後，用剪刀剪一小塊，放入油內中火炸到金黃。
如果太黏，用水濕下就可以。

另一盤係用普通暖水+適量酵母粉，拌勻加入，搓麵方法同上面一樣，不過今次係等2小時，而且中間要加水幾次，每次搓多一分鐘。
2小時後，佢變咗咁樣，好似自己用洗面粉方法整出來嘅麵筋。

又係用剪刀剪一小塊，放入油內中火炸到金黃。
加咗酵母粉果一盤，炸嘅時候明顯地係鬆啲，而且發脹得勁啲。

炸完，兩盤比較下。

無用酵母粉果一盤，明顯係實淨啲，中間仲有肉嘅感覺。

加咗酵母粉果一盤，感覺泡泡啲，似街邊拮魚蛋時，有時會有一串串齋麵筋，嗰一種囉。

跟住各自炆煮，今次麵糰軟咗，煮嘅時間比上次短。
無用酵母粉果一盤，大概炆煮15分鐘左右。
加咗酵母粉果一盤，大概炆煮8分鐘左右。

今次整咗四種口味，有齋叉燒，咖喱齋，豉油齋同酸齋。
食後感係，勁。好。味！！同平時齋舖買嘅係一樣㗎！！
王子大讚今次好好食，佢起初對呢類食物感覺麻麻，依家態度轉晒啦。