白蘆筍素肉卷

呢排白蘆筍當造，又平又靚。
今年少咗食肉，多咗食魚同食素，亦開始研究吓新嘅素食譜。
今次整白蘆筍素肉卷。
先整個素肉。
120g麩質蛋白粉（vital wheat gluten flour）+20g普通麵粉+少少蒜粉+少少黑椒粉，拌勻。
大半杯水内加入1／3茶匙鹽，1湯匙豉油，1／2茶匙糖，拌勻。

將液體逐少逐少加入，唔夠要另外加水，搓到麵糰唔再吸水，蓋上布，等30分鐘。
30分鐘後，用水濕下剪刀，再將麵糰剪開小塊，之前要數定自己做多少條素肉卷，因為剪開咗之後嘅麵筋，好難再黐得埋。
我今日整18條，咁就剪開18小塊啦。
如果太黏手，加少少水濕下個麵糰就可以。

用水濕下工作枱同麵棍，壓麵糰至長條形。

放上白蘆筍，捲起，之後放上已濕水嘅碟上面。
如果無白蘆筍，可以用甘筍西芹代替。

用中大火，少少油煎兩面至金黃。

準備調味汁料，我今日用咗大半杯水，加入1／5茶匙鹽，1湯匙豉油，1湯匙茄汁，1茶匙糖，1茶匙陳醋拌勻。
將調味汁料倒入，加蓋，中大火煮至收汁，中間唔駛反，只係間中搖一搖個鑊就可以。

今日嘅新煮意：白蘆筍素肉卷。