自助手卷晚餐

有好幾日冇食魚啦，又係時候食返餐。
整定啲醋味飯團波波，魚生，苜蓿芽，紫菜等等。。。
今晚食手卷，仲係自己包，次次整手卷，整完一碟啲紫菜已經由脆卜卜變成淋pat pat，今次索性自助形式，自己手卷自己捲。

放一舊飯响紫菜面，45度角，用茶匙壓平一點，放少少魚生，少少苜蓿芽，拎起紫菜嘅左下角，順勢捲就會成為雪糕筒嘅形狀。

就咁就食得，而且啲紫菜仲係脆卜卜嘅。
我家王子見到呢壇嘢十分興奮，好似小朋友咁，開開心心走去洗手，佢一向鍾意呢啲將做手工同食物結合嘅進食形式，十分有興趣。
我梗係開心啦，可以做少啲，啲紫菜又冇變咗淋pat pat。。。
呢個形式開party都唔錯，功夫少，又可以遷就晒唔同人嘅口味。