芝士香蔥肉醬厚多士

某日晚上，整咗兩大條健康枕頭包。
早上起來，發現有人已經開咗嚟食，仲好富貴咁用意大利買返嚟嘅松露蜜糖搽嚟食添。
突然，發現屋企有聲，原來佢唔想返工，想home office喎。
即係，我要臨時整個二人lunch。

屋企冇準備，見到咁多麵包，我諗起日式超市嘅厚切方包，就整厚多士啦。
屋企有一小盒嘅湯渣肉醬，立刻解凍。
先預熱焗爐至200度。
方包切成一寸至一吋半厚，上面搽啲湯渣肉醬，再搽啲沙律醬，放上少少蔥花，灑上少少鹽同黑椒，再灑上芝士碎。
放入焗爐最下層，焗3分鐘。

再放最上層，焗3分鐘。
咁就搞掂啦。

是日快餐：芝士香蔥肉醬厚多士，配熱咖啡。