我的網誌清單

2016年11月20日星期日

荷葉餅

今日整荷葉餅。
我諗,冇乜人知道,乜嘢係荷葉餅。
佢仲有個名,叫潤餅,我諗,都係無乜人聽過。
其實,佢仲有好多唔同嘅名,不過,都應該係冇乜人聽過,但係佢,其實好多人都食過,佢,就係用嚟包片皮鴨個塊皮。
一啲都唔難整,開工啦。
麵粉內加入鹽(麵粉最好係一般中筋粉,一半高筋粉,如果無,用全中筋粉都可以),拌勻,慢慢倒入熱水,拌勻。
熱水嘅比例大約係麵粉嘅一半,即係一杯嘅麵粉,雖要大約半杯水。
跟住,等大約10分鐘,冇咁熱,將佢搓成麵糰。
太乾,加少少暖水再搓。
太濕,加少少麵粉再搓。


跟住蓋上布,等15分鐘。
將麵糰分開幾舊,灑上麵粉,搓成長形,切開一舊舊。


切面向上,上下同麵粉棍都要有足夠麵粉,然後將佢壓平,壓到當你拿起向著盞燈,會有透光感,就ok啦。
呢種100%由燙麵做成嘅麵團會比較黏,所以壓平時要用多點麵粉,但係好處係,佢柔軟度好高,好易將佢壓薄,一啲都唔費力㗎。
跟住將佢放上已燒熱嘅易潔鑊內,用中火,唔駛落油,烘熟佢。
第一面大約需要40秒,另一面20秒就夠啦。
同時間,其實可以整另一塊,通常一塊壓平,另一塊就烘熟啦。


完成之後,可以放涼入雪櫃,食之前,稍稍蒸熱佢先食。
呢種先烘後蒸嘅方法,會令荷葉餅柔軟之餘,帶有彈性,唔會過濕,亦唔會過硬。
本週嘅鴨鴨大減價,我哋又食片皮鴨喇,今次由王子負責片皮!!掌聲鼓勵!!!
一如既往,我今次都係做咗一大疊荷葉餅,順便可以食一餐捲餅。
荷葉餅好適宜入冰格冷藏,有時間做多點,放入密實袋冷藏,諗唔到食乜,或者懶蟲上身嘅日子,攞出嚟解凍蒸熱,隨意準備啲配料,就有捲餅食啦。


24 則留言:

  1. 謝謝分享, 我今日見超市做特價, 都買左鴨腿片皮鴨. 這個仔仔好喜歡, 佢一次可以食好多件. 👍🏻

    回覆刪除
    回覆
    1. 係咪連埋啲麵皮一齊賣㗎?

      刪除
    2. 我買特價鴨腿齊肉, 所以要自己整荷葉餅. 如果要有麵皮再貴多一倍價錢. (仲一盒得十片皮, 三個人吾夠食)
      所以都係自己整番.

      刪除
    3. 不過我試過呢度買現成,都係貴㗎,而且品質唔太好

      刪除
  2. 都幾簡單易做喎,多謝分享!

    回覆刪除
  3. 有一年去美國旅行打工,工作地方是北京烤鴨專門店,我見裡面個師父都好似你咁整塊餅皮,當時我心想去買包春卷皮返嚟咪得咯,哈哈…原來我係大鄕里!

    回覆刪除
    回覆
    1. 兩樣真係好唔一樣,口感完全唔似

      刪除
  4. 潤餅, 我識喎, 係台灣食過添

    回覆刪除
    回覆
    1. 兩樣唔同嘢嚟㗎,台灣潤餅源自福建,比較似春卷皮,做法難好多囉

      刪除
  5. 自己整的會很有彈性,好好食。現成貨只是買到方便。

    回覆刪除
    回覆
    1. 現成貨我哋都好少見,我估你度會容易買到??我都係買過一次咋,王子話又差又貴,從此就無再買過啦,你講得啱,係買到方便囉

      刪除
  6. 潤餅我聽過,不過未整過,看來唔難整,謝謝分享

    回覆刪除
    回覆
    1. 我覺得容易呀,粥粉麵飯食到厭,可以食吓呢

      刪除
  7. 自家製餅加片皮鴨真係超正.....

    回覆刪除
  8. 我有福建朋友整過潤餅,不過我唔記得係乜樣啦,唔知同你呢個同唔同。你係福建人?

    回覆刪除
    回覆
    1. 唔係呀,不過福建果種我食過好多次,中間主要係蔬菜,香港都有得食㗎,福建薄餅比起呢種薄好多,似厚少少嘅春卷皮囉

      刪除