我的網誌清單

2016年5月17日星期二

厚蔥油芝麻大餅

最近嘅蔥平咗好多,買咗一紮,整咗幾樣嘢食,仲係有好多。
咁不如整一次厚蔥油芝麻大餅吧。
前一晚,將150g麵粉,加入少少酵母粉,逐少逐少加入暖水,搓成一團,唔使靚唔使光滑㗎,然後入盒入雪櫃。
第二日,佢變咗老麵。


準備450g 麵粉,加入1湯匙糖,2/3茶匙鹽,拌勻。
右上角係暖水,酵母粉,1/2茶匙糖,拌勻。
右下角係撕成一塊塊嘅老麵。



將佢哋混合,再逐少逐少加入暖水,搓成一團,蓋上布,等一小時左右至發大到兩倍,夏天等嘅時間短的,冬天就長啲。


工作枱上灑上麵粉,將麵糰壓成長形,塗上油,灑上蔥粒同1/2茶匙鹽。


我今次响鹽內加咗少少五香粉,等個餅香啲。


捲起。


再捲成蛇餅形。


在大碟上塗上油,將麵糰放上,再於麵糰上塗油,然後包上保鮮紙,入雪櫃等3小時。


3小時後。。。嘩嘩嘩,發脹晒!


準備好易潔平底鑊(我用咗28 cm),鑊內塗多一點油,將麵糰反轉倒入去,因為隻碟已經塗油,麵糰唔會黏住隻碟,好易可以甩出來。
在麵糰上面塗油,灑上大量芝麻,加蓋,用細火煎25分鐘。


麵糰會慢慢發脹,升高。


25分鐘後,反轉,加蓋,用細火煎20分鐘。
睇下幾金黃!脆卜卜呀!


煎好之後,等5-10分鐘先開始切。
晚餐係漬菜同厚蔥油芝麻大餅,加兩杯碧螺春。


新鮮煎餅脆卜卜,個心又軟淋淋,好好味。
食剩咗,第二日做早餐,依然係好好食,充滿彈性㗎。


22 則留言:

  1. 妳做得真喺超像樣,超讚♡♡♡
    我喜愛葱油大餅,
    見到都知好美味♡♡♡

    回覆刪除
    回覆
    1. 多謝讚賞!
      呢個我細個成日食㗎,以前有啲小店淨係賣呢啲包點類同豆漿,依家唔知有冇lu

      刪除
  2. 我細個時既早餐係這個餅伴咸豆漿, 好味道. :)

    回覆刪除
    回覆
    1. 因為屋企夜食晚飯,我一定要食下午茶,有時會買呢個+甜豆漿

      刪除
  3. 好有心機整呢,我最鍾意食這種蔥大餅,香港都唔見有。

    回覆刪除
    回覆
    1. 以前真係好多呢啲包點類同豆漿小店,我通常會企晌度,等佢哋新鮮煎起,最好食

      刪除
  4. 我都好想整,但時時都發唔起,好冇心機呢!
    而呢個包包感覺有啲似focaccia啊!

    回覆刪除
    回覆
    1. 如果發唔起,應該試下買其他牌子嘅酵母粉,用上面講嘅方法開咗啲酵母粉,等一陣應該會見到好多泡泡,證實咗work先開始搓麵,咁無咁嘥心機呢
      呢個相對focaccia,係比較紮實,但係响同類嘅大餅中,呢款係比較軟腍腍

      刪除
  5. 咁啱今日買咗好多蔥,可以跟你整呢個.

    回覆刪除
    回覆
    1. 呢個跟足步驟係好容易整到㗎,唯一難啲啲可能係反轉煎另一面果個step,個麵糰要煎到夠firm先反

      刪除
  6. 超強吸引我的視覺和感覺!

    回覆刪除
  7. 我都鍾意食這個大燒餅,這裡啲中國店會加辣椒粉喺上面,嘩,好食到吖。

    回覆刪除
    回覆
    1. 係呀,加辣椒粉我都食過呀,尤其係素嘅燒餅,會提升個食味㗎

      刪除
  8. 我前幾日都買左幾棵蔥整蔥油餅同蔥油呀

    回覆刪除
  9. 早餐可以配埋豆漿,正呀^^
    喱個唔駛焗爐都掂喎

    回覆刪除
    回覆
    1. 係呀,呢個唔駛焗爐,用易潔平底鑊就得,好多家庭都整到

      刪除
  10. 回覆
    1. 超鍾意呀,佢好鍾意有蔥既食品

      刪除