我的網誌清單

2016年5月23日星期一

Pasta Omelette

昨天有位小女孩來我家,是王子同事嘅囡囡,爸爸生日,想同媽媽單獨出去玩。
點解叫佢小女孩,唔係叫佢小公主呢?因為佢話,佢唔係公主,只係普通小女孩。
我們這裡唔流行baby sitting,即使有,都貴到飛起,我有個美國朋友,經常抱怨唔方便。
囡囡開始長大,爸爸想佢學習獨立同其他人相處,同時媽媽又要學下放手,所以大約一年半前,久不久會帶佢嚟,今次係第一次放低佢全日响我哋屋企。
不過呢,佢哋無端端話想食埋晚餐先返嚟,所以我要準備嘢俾小女孩食。
小女孩出名唔鍾意食嘢,我是是但但整咗番茄雜菜pasta,同炸魚手指俾佢。
食剩咗啲啲pasta,我唔鍾意食隔夜餸,所以會將佢改裝,成為一人午餐。


呢個pasta嘅份量,再加入兩隻蛋嘅蛋液,少少鹽,少少黑椒粉,少少tabasco,拌勻,讓每一條pasta都沾到蛋液。

其實你都可以加啲火腿,芝士,吞拿魚嗰啲落去,不過我今日諗住食素,就咁算啦。


易潔鑊內加入少少油,用中火,平均加入pasta。


加蓋,用中小火煎約15分鐘。
呢個時候,我可以走出去小菜園搵配菜。。。


15分鐘後,檢查中間蛋液是否已經凝結,夠實淨,就可以反轉煎另一面。


我呢個係番茄pasta,顏色會深少少,如果你用香草pasta,芝士pasta整,顏色會淺啲嘅。
另一面,唔駛加蓋,煎多幾分鐘就得。


加啲沙律醬,香草同沙律菜,便是我的一人午餐。
呢個方法適合任何形式嘅pasta剩菜,尤其係得返少少,好過倒咗佢,浪費咗。。。


20 則留言:

  1. 好煮意, 我家常淨番D意粉.

    回覆刪除
    回覆
    1. 我屋企都係咁,而且隔夜意粉無隔夜飯咁易處理

      刪除
  2. 估唔到德國唔興 baby sitting, 會唔會有人係屋企幫人睇細路?

    回覆刪除
    回覆
    1. Regular basis嗰啲有,但係只係突然有需要果啲,就好少,通常係搵鄰居同親戚朋友幫手

      刪除
  3. 回覆
    1. 係啦,有時得返少少,都唔知點處理好

      刪除
  4. 小女孩在你家時會有咩搞作,同狗哥和貓貓佢地玩?定係睇電視打機?
    意粉變pizza,又幾得意喎一煮兩食^^

    回覆刪除
    回覆
    1. 我哋通常會同佢講故事,睇睇圖畫書,响小菜園摘花玩吹番梘泡,屋企附近有幾個大型兒童遊樂場,會同佢去玩咁囉

      刪除
  5. 咁都唸到, 勁!以後食剩D意粉多個煮法, 唔洗次次都剩係翻叮!

    回覆刪除
    回覆
    1. 我覺得意粉有啲難搞,翻叮又有啲乾,翻煮有時又會淋pat pat

      刪除
  6. 真係好煮意,今晚讓我用食剩嘅penne 試下先 ^^, thanks dear!

    回覆刪除