香草薯絲餅+薯仔儲存方法

是日好勤力，煮咗三餸。

我地啲薯仔大大袋買架，散買都有，不過勁貴。。。
咁大袋點存放先無咁易出芽呢？洋人會入紙袋、用報紙包、放在暗涼地方，例如地窖，但唔好放雪櫃。
再放幾隻蘋果响薯仔旁邊，蘋果會釋出乙烯，阻止薯仔出芽。
咁出咗芽嘅薯仔你仲食唔食呢？我自小深受「自然教育」(>>>薯仔出芽＝有毒＝食咗唔死都嘔白泡)影响，以前係唔食出咗芽嘅薯仔嘅。
有次去德國朋友屋企， 見佢批咗啲芽照煮，驚自己中毒身亡，只好不恥下問。
喔！原來批咗啲芽再煮熟就冇問題！當然啲芽已經長高就唔好再食，只可以用黎種薯仔啦。

今晚有香草薯絲餅，我呢個係Rösti，瑞士式嘅薯絲餅，冇落蛋冇落粉架。

仲有加咗魚同蟹嘅泡菜湯。

怕王子唔夠餸，整多個蘿蔔牛腩。

香草薯絲餅


食譜:

材料﹕
中薯仔4個
洋葱1個
香草適量
沙律醬適量



調味:
黑椒碎1/4湯匙
鹽約1/3湯匙 


薯仔刨成薯絲，洋葱切絲， 
加入香草調味拌勺，待20分鐘
易潔鑊內加少許油，加入薯絲壓平， 
用中火煎至一邊定型及金黃，再煎另一邊至金黃，
沙律醬加上黑椒碎作沾醬。


如果想香啲好味啲又唔怕肥，可以加啲牛油一齊煎架。