洋薏米鹽麴鴨脾配迷迭香海鹽焗蔬菜

上次培植咗洋薏米麴，做咗一小樽洋薏米鹽麴，試用黎整鴨脾。

鴨脾依然係買產自法國Sablé-sur-Sarthe嘅麝香鴨，鴨肉較一般嘅彈牙，肉汁十分豐富，有鴨香。
呢個洋薏米鹽麴鴨脾非常特別，係我估不到嘅味道，佢竟然帶有臘腸、膶腸嘅香氣。
帶有臘腸、膶腸香氣嘅西洋鴨脾，好似一個帶有中國人靈魂嘅西人。。。哈哈哈。。。
我家有3種麴做鹽麴：米麴、簥麥麴同洋薏米麴，比較之下，我喜歡洋薏米麴。
米麴比較甜咗啲，搶火；簥麥麴，唔夠甜；洋薏米麴，啱啱好。

配菜是迷迭香海鹽焗蔬菜。
是日精選蔬菜用了Vitelotte Potatoes、黑蘿蔔、翠肉瓜及紅椒。

我影完相， 王子已經差不多食完佢隻鴨脾，接着用鴨汁點菜食。
我食完自己隻鴨脾，啲蔬菜已經所餘無幾。
我呢餐......唔夠王子快........食唔飽。。。

上次做迷迭香海鹽焗根莖蔬菜時，沒寫下食譜，今次寫寫吧。



迷迭香海鹽焗蔬菜


材料﹕ 
蔬菜(例如紅蘿蔔、紅菜頭、翠肉瓜、紅椒)1kg
香草適量
油3湯匙


調味: 
鹽1/4湯匙

黑椒碎1/4湯匙



預熱焗爐至240度，
將蔬菜切好，難熟的要切薄/小一點，
將蔬菜、香草、油及所有調味拌勺，
將蔬菜鋪在焗盤上，盡量不要重叠，焗20-25分鐘，至蔬菜出現焦香。