刁草南瓜湯、紅酒浸鴨胸伴濶麵

紅酒浸鴨呢味菜最近我整咗N次，王子仲係未食厭。
又買咗隻鴨拆骨起肉，今次鴨胸同鴨脾都用紅酒浸。
鴨胸浸咗4日先煮，伴濶麵食。

紅酒浸鴨胸比較濃味，想整個清淡嘅湯飲。
仲有半隻魚翅瓜，整咗刁草南瓜湯。

鴨胸要中間粉紅色啲肉質先唔鞋同柔軟。

今次嘅刁草南瓜湯用咗魚翅瓜，會比較清淡。
如果喜歡較濃味，可以選用其他品種嘅南瓜。
想令個湯更creamy，可以加薯仔同煮或於食前拌入忌廉。

刁草南瓜湯

食譜:

材料﹕
南瓜粒400g
洋葱1隻切碎
刁草碎2湯匙
素湯/雞湯1杯
牛油少許
水1杯


調味:
黑椒碎1/4湯匙
鹽1/4湯匙 


用油爆香洋葱碎 ，加入南瓜粒略炒，
加入上湯、半杯水、黑椒碎及鹽，煮南瓜至軟，
用blender將南瓜湯打成茸，  
如有需要，可再另外半杯水調節稠度，
用牛油爆香刁草碎 ，加入南瓜湯， 煮湯至滾，試味。