自家製純天然治喉嚨痛咳藥水

我以前係嗰種一開始咳就唔停嘅人，最高記錄係大半年，一兩日好番少少又番咳。。。

當時英國啲大學醫院去過，香港啲大醫院又去過。
英國醫生話係天氣，香港醫生話係污染。
中醫試過幾個月，完全冇反應。民間嘅燉川貝、燉橙、燉雪梨、燉鱷魚肉全部唔得。
醫生話再唔好要轉哮喘，本來打定輸數，點知俾一個澳洲兒科醫生醫好咗。
之後每次開始喉嚨痛同咳我都好緊張，但小心極都要咳成個月先停。

最後輪到德國醫生，佢開啲唔係咳水係懵仔藥但係又好掂。
但係佢見我成日開始喉嚨痛同咳，唔想我食咁多藥話冇益，建議我自製純天然治喉嚨痛咳藥水。
佢話係德國啲民間智慧，佢大約八、九成病人話work。

材料簡單：大量洋葱、糖

糖可以選擇自己喜歡的，砂糖、黑糖、黃糖、蜜糖都得。
將洋葱切碎(可以用攪拌機)，在杯底放一層薄糖、一層碎洋葱、一層薄糖......至杯滿。
將一隻碗/碟放在杯上，然後反轉，待半小時至1小時會見有汁液流出，那便是藥水。

(因為有blog友久咳未癒我早啲出呢個post，我其實今日冇整而上圖只係demo所以冇汁液)

德國醫生話其實個譜係有科學根據架，因為洋葱有殺菌功效，可以殺死口腔同喉嚨嘅菌，啲菌冇哂喉嚨痛同咳就會消失。
飲完之後唔好立即飲水要等佢殺菌。因為純天然所以飲完唔會有睡意。
喉嚨痛同咳一開始時要儘快整，通常飲幾次就冇事。
如果咳咗一陣都可以飲，但菌多咗就要等耐啲先會好呢。


呢個方法我已經用咗一段長時間，真係好掂喎。