魷魚一夜干

突然想食一夜干，屋企有魷魚，咁整魷魚一夜干啦。
呢個係日本漁夫自家製菜式，漁夫捕捉到大量魷魚，拎去賣之餘，會留啲俾自己食，例如做刺身，但係要長期保存，做一夜干都係好方法。
日本漁夫會將魷魚劏好，再用海水洗淨，用海風乾一晚，早上便有魷魚一夜干食啦。
魷魚一夜干，加上熱乎乎嘅味噌湯、白飯，加點漬物，係好美味嘅日式早餐。
海水海風我冇，不過都整到架！
魷魚劏開，水加入3-5%海鹽拌勺，加入魷魚等5分鐘。

倒走啲鹽水，串起啲魷魚，掛起，自然風乾就可以。
係咪好簡單呢？
咁要風乾幾耐呢？要睇個人口味啦，一般有風嘅話大半日已經可以。
風乾得耐，魷魚味會濃啲但冇咁軟，所以真係要自己決定。

一夜干其實係一個慳家餸，因為可以趁魷魚平嘅時間買多啲，做好包好一份份入冰格，要食便拿一份出來。
可能天氣凍又冇風，我已經風乾咗20小時都唔係勁乾。
咁我再用廚紙印印啦！

燒熱易潔鑊內，不用加油，加入魷魚，用大火烤熟就得。
魷魚一夜干可以用黎BBQ，又可以用多士爐烤兩隻用黎送啤酒，日本人食魷魚一夜干通常會點沙律醬食架。
呢個其實係日本人嘅懶人餸，要加餸，就原份冷藏魷魚一夜干用多士爐去烤。
我今日整嘅係魷魚一夜干沙律。

因為魷魚啲水份抽乾咗，魷魚味會濃咗。
烤嘅時候又唔會有水出，令啲魷魚味可以keep住唔會少咗。
下次我會試風乾耐啲，睇睇效果會點。

另一味係茄子肉醬，因為要有汁俾王子撈飯呀。

呢餐我幾鐘意呀。