葱油餅

最近食咗兩次煎餃，仲係有啲意猶未盡。
見到葱大減價，靈光一閃，閃出葱油餅來！
早上做好葱油餅麵團，晚上再煎來吃。

用了450g麵粉，大概可以做6塊大嘅葱油餅。
麵粉內加1/3湯匙鹽拌勺，加入約1杯滾水，拌勺，再逐少加入凍水搓至光滑不黏手。
之後用布蓋好，等20-30分鐘「醒麵」。

將麵糰分成六份，取出一份麵糰，其餘的用布蓋好。
將麵糰壓成長條形，掃油，灑少少鹽及葱粒，捲起再捲成蛇餅形，再上上下下掃油，入雪櫃雪6小時以上。
用手壓平麵糰，易潔鑊內掃油燒熱，將葱油餅直接放在易潔鑊內，用中火加蓋煎葱油餅兩面至脆。 

一面煎一面吃，熱辣辣嘅葱油餅脆卜卜頂呱呱。
我比較愛薄嘅葱油餅，你呢？

自家葱油餅脆卜卜之外，不會太油。
記憶中外面買嘅葱油餅，脆但都是油用得較多。

葱油餅特色之一：一層層。