湯渣健康包

我種咗幾盤羅勒，最近長得好茂盛，又係時候要食下佢。

一大把嘅羅勒，加上一盒嘅湯渣，係我今日想清理嘅食材。

湯渣羅勒一同打碎。

我今日打算整羅勒蒜香健康包，用咗普通麵粉，高筋麵粉同斯佩耳特小麥粉（spelt flour），加入海鹽，乾蒜粒，酵母，拌勻。

加入羅勒湯渣，橄欖油，搓成麵糰，水份唔夠另外再加。
等兩次發酵。

我今日費事諗造型，搓成小圓球入模，再發酵一會，入焗爐185度焗熟。

完成放上架上稍為放涼。

麵包質感係咁嘅，同德國人愛吃嘅麵包好似，類似我哋响麵包店買到嘅健康包。

搽啲芝士醬上暖麵包，王子同我都覺得好食，好香呀。
雖然係健康包，但係一啲都唔硬，係軟熟嘅，咁當然唔係香港空氣方包果種軟熟啦。
呢個方法唔錯，可以迅速消滅一大盒湯渣，而且味道好，一定有下次。