增量漢堡扒

屋企食剩咗幾個麵包仔，已經好硬下，先用水浸軟佢哋。

然後將大部分水揸乾。

屋企有來自俄羅斯嘅跳樓貨雞油菌。

仲有跳樓貨混合豬牛肉碎。

超抵買呢。
我打算整增量漢堡扒，整漢堡，其實最好係用混合豬牛肉碎，質感同香味都會好啲。
增量法响日本好流行，原理係將其他食材混入肉當中，等食嘅人感覺到有肉食，睇落好似好多肉咁，但事實並唔係咁，係一種廚藝上嘅掩眼法，主要嘅目的通常都係為咗慳錢同健康，亦都可以幫助改變現代人多肉少菜嘅生活習慣。

麵包，肉碎（500g），黑椒碎，少少香料粉（我用咗摩洛哥混合香料），蒜蓉／蒜粉，鹽，糖 ，日本醬油，一隻蛋，用攪拌機拌勻，再放入雪櫃雪半小時。
因為加咗麵包，呢個份量整出嚟都唔少㗎，係一般嘅五人份量。

整濕手，將肉醬分成幾份，我今日想整厚嘅漢堡扒，所以只係分成四份。
燒熱鑊，加入油，用中火煎一分鐘後，加蓋繼續煎。

直到見到啲肉轉色。

就可以將佢反轉，再加蓋煎到另一邊金黃，就可以盛起。

原鑊加入甘筍粒，炒到見到啲油變橙色。

加入雞油菌，黑椒碎，蒜蓉，無當然可以用其他菌類代替啦。

炒到菌類開始軟化，就可以加入自己喜愛嘅汁料，煮多一陣，試味就可以熄火。
我今日係茄汁，意大利陳醋，摩洛哥混合香料，紹興酒，日本醬油，老抽，糖，水，同麵粉拌勻。

增量漢堡扒餐完成啦，我哋今日配麥穀糠飯。

入面好鬆軟㗎，不過要注意，如果麵包落得太多，肉味太少，就會唔再似食漢堡扒，一般嚟講，肉同麵包嘅比例大概係5：4，咁就差唔多啦。