日式炒牛蒡絲

菜價高，呢排就成日响小菜園搵嘢食。
今日嘅主角係，有機牛蒡。

日式便當中，我最鍾意食果堆日式炒牛蒡絲，呢個前菜叫Kinpira Gobo，深受日本人喜愛。
煮法其實好簡單，但係刨絲就要啲時間。

首先，牛蒡其實係唔應該刨皮，咁會好浪費，其實只要輕輕用刀刮下個啡色表皮，啲外皮就會甩出嚟。

其次，牛蒡絲其實唔應該用刀切，應該要用刀削，因為牛蒡其實係分開兩部份，當你切開時，會發現有個圈，圈外圈內嘅質感同軟硬度其實係唔一樣嘅，所以如果用刀切，就會變咗有啲全硬，有啲全軟，所以應該用刀削，咁就會確保佢哋平均啲。

先响牛蒡身上用刀界幾條痕，跟住類似刨鉛筆咁，手持牛蒡一端，另一面用刀斜角咁削，就會成絲，咁樣煮出來嘅牛蒡絲先會好食。

通常呢個前菜會配甘筍絲一齊炒，處理方法都係一樣。

材料準備好，就可以先用白鑊中火烘芝麻幾分鐘，跟住將芝麻倒出，加入多一點嘅油，放入甘筍絲同牛蒡絲，炒兩三分鐘，再加入糖，份量視乎你係咪食得偏甜，就多一兩分鐘，最後加入日本醬油，炒多幾下，試味，熄火，加入芝麻，拌勻。

放涼之後可以入盒，雪凍先食，當然，你都可以熱食啦。
呢個前菜好爽口，我食極唔厭㗎。