東歐超

好耐好耐冇去過東歐超啦。
某天去探完朋友，見東歐超就在附近，咁一定要去一趟啦。
真係變幻原是永恆，一段日子冇見，佢已經有啲改變，雖然佢依然係東歐超，但係竟然賣多咗好多亞洲同其他地區嘅食品，仲有亞洲蔬菜賣添，顧客都多咗亞州人面孔。
而且，最攞膽嘅係，佢嘅價錢平過亞超好好好多呀！！！
是日買來嘅係蒜芯同印度苦瓜。

仲有葡萄牙出產嘅咖啡。

本地人其實唔多用煉奶嘅，所以一般超市係買唔到嘅。
東歐超就唔同啦，好多煉奶嘅品牌，有成十幾款添，左邊兩罐係波蘭品牌，右邊嘅真係唔知，我好鍾意試新嘢，又買嚟試下先。

隔日，馬上煮吓啲食材先。

蒜芯我真係未買過，印象中都好似只係見過一次，好貴，所以無買。
今次係蒜芯炒蠔菇，王子第一次食蒜芯，從佢嘅反應就知佢有幾鍾意食。

呢碟我獨食得啦，涼瓜煎蛋，真係久違嘅味道。

仲有隔夜嘅紅酒湯渣炆牛筋，隔咗夜，仲好食呢。