韓式青口清湯

開始進入秋天，藍青口上場啦。
今日仲買到跳樓貨添。
是日，我打算整韓式青口清湯。

今年天氣唔好，連帶菜價都貴到飛起，有好幾次，响超市嘅蔬菜部行咗幾轉，都係買唔落手，明明係夏天，菜價就好似冬天咁，咁，今年咪好慘囉，夏天未食過平蔬菜，轉眼間踏入秋冬，又要捱貴菜。。。。
嬲嬲地，唔鬼買啦，用咗小菜園嘅蘿蔔同翠玉瓜嚟做湯嘅配料。
鍋內放入兩大碗水，加入蘿蔔片，蘿蔔葉段（如果有），已浸透嘅海帶，蒜蓉1湯匙，少少白胡椒，中火煮至材料軟，中間可以用湯匙去除啲泡泡。

加入翠玉瓜片同青口，攪拌一下，煮至青口開口就可以，跟住加入約一湯匙嘅蔥花，攪拌一下，等一分鐘，試味，睇下夠唔夠鹹，ok就可以盛起啦。

放入碗後，灑上少少蔥花，熟蒜同麻油，加一小碗麥穀糠燕麥飯，就係我哋今晚嘅清淡晚餐。

清淡得嚟，呢個湯好鮮味，啱晒要減磅嘅王子。
其實呢個韓式青口清湯通常仲有個汁料，用來點啲青口食，不過我覺得都夠味喇，唔好食咁咸，就唔整lu。