低脂焦糖燉蛋

某日嘅跳樓貨係鮮奶。
Hmm。。。整乜好呢。。。。。
不如整低脂焦糖燉蛋。
呢個真係唔係法式嘅焦糖燉蛋，法式要用上鮮忌廉，而且係用蒸焗嘅方法整出嚟，好香不過真係好邪惡，我呢個只係用咗全脂奶，所以相對算係低脂吧。
我嘅習慣係，有甜品一定要有咖啡。

做法都好簡單。
800ml 雞蛋，加入4湯匙砂糖，拌勻，再加入1 liter 鮮奶，拌勻。
將蛋液注入杯內， 在用小匙去除上面嘅泡泡，上面包上錫紙。
煲滾水，轉中細火，火不能太大，隔水蒸15分鐘左右，熄火，再焗5分鐘，檢查是否已凝結。
如果你嘅杯細，就要減少啲時間。
取出，放涼，入雪櫃。
食之前灑上砂糖，用火槍燒吓就完成啦。
我好鍾意呢個起到一塊嘅焦糖啊。。。。。。。

要遷就王子口味，我無整到啲蛋勁滑勁水汪汪果種，反而係實返少少有啲口感果種。
如果你鍾意滑啲，可以將蛋液份量減到750ml左右。