素沙茶麵疙瘩

是日，打算做麵疙瘩。
麵疙瘩係一種北方好流行嘅麵點，沒有江南麵食那種細緻精巧，相對比較粗獷同家常。
做法都係各家各法，我通常係先將大約半茶匙嘅鹽放進冷水，拌勻至溶解。
盤裡加入普通麵粉，中間開個洞，倒入鹽水及少少橄欖油，再將佢搓成團就可以。
如果喜歡口感多一點，水份就不要加太多，麵糰要偏向結實。
跟住醒麵，夏天大概半小時，冬天就一小時，跟住其實已經可以用，但係我比較喜歡放入雪櫃，冷藏幾小時以上才用。

最近我煲素湯，總會留下一兩盒，用來做湯麵嘅湯底，幾好味㗎。
今日用一盒，加半盒清水，加入已經浸泡好嘅海帶結，蘿蔔片同粟米，加蓋用中火煮十分鐘左右，期間盡量將食材產生嘅泡泡撇去。

加入一茶匙嘅花生醬，一茶匙嘅素沙茶醬，煮兩分鐘。

湯煮緊嘅時候，可以將麵糰壓平，類似皮帶咁，跟住轉最細火，然後將佢撕開一塊塊放入湯內，煮大概三至四分鐘，試味，加入少少淡奶／鮮奶，熄火等一分鐘。

跟住就完成啦，係咪好快手呢？？因為用咗素湯底，本身個湯好鮮味，再加上打邊爐沙爹湯底嘅香氣，王子好鍾意食呢。

麵疙瘩唔需要天天做，我通常係一次做好一團，入雪櫃保存，想吃便拿一點出來放湯，好方便㗎。