貓不可以貌相

看著三色貓呢個可愛睡寶寶樣，大概，你同我一樣，會俾佢呃到。
最近發生咗幾件事，真係令我完全改觀。

之前睇過一啲統計同研究，講三隻色嘅貓有一定嘅特性，係愛發嗲，黐身，固執，勇敢同護主。

頭三樣我都見識過啦，第四樣，我真係估佢唔到。

事件一：某日八卦鄰居隻狗經過，我又唔在場，見到三色貓，隻狗係金毛尋回，望住佢，雖然大家體型相差幾十倍，而且三色貓嘅體型係屬於偏瘦小嘅，但係三色貓毫無懼色，完全當佢透明，一啲都唔驚，掂行掂過，八卦鄰居隻狗已經响小社區駐場多年，話晒都係大佬，覺得被睇唔起，被侮辱，發癲咁吠佢同追佢，三色貓就立即爬上高處，望住隻狗，擺出個寸寸貢嘅衰樣，然後搖尾，囂張到出面。。。。

事件二：某日另一隻狗經過，有用狗繩，見到佢，狂吠，佢竟然唔郁，望一望隻狗，跟住望住個狗主人搖尾，完全係睬佢都嘥氣嘅樣，我同狗主人反而好驚，後來狗主人忍唔住烏低身同佢講：你都好老定喎。。。

事件三：某日我同三色貓去散步，係呀，其實除咗同狗散步，同貓都得㗎，去到某一個路口位，我見到兩個老人家帶著隻狗，無用狗繩，隻狗仲幾大隻添，我停低同三色貓講，唔行住啦，有狗，佢真係即刻坐低，兩個老人家都好醒目，叫隻狗行另一邊，但係隻狗唔理，行近三色貓吠叫，三色貓終於發火，撒亞人上身，啲毛豎起晒，突然間大隻咗好多！！好似泵咗氣咁！！！好有氣勢呀！！！跟住佢撲上去，抓隻狗嘅屎忽！！！！！隻狗嚇到成隻彈起兼嗚嗚叫！！！！跟住三色貓明顯條氣仲係唔順，再嚟一次抓屎忽，隻狗即係敗走，條尾耷晒，最驚其實又係我哋呢啲人類，我同兩個老人家你眼望我眼，嚇到唔知點俾反應，我唯有即刻叫停三色貓，叫佢放過隻狗，其中一個老人家立刻同隻狗講，下次唔夠打就唔好撩人，明知自己細膽就唔好搞事。。。另一個老人家忍唔住烏低身同三色貓講：你咁細隻，但係都超勇敢喎。。。

我每次向王子匯報呢啲事，佢都笑到反艇，我諗，我哋都係唔駛太擔心佢响出面嘅安危，怕且係啲狗要擔心多啲，睇住自己個籮柚至好。。。。