冬日草莓

去土超見到士多啤梨做特價。王子係士多啤梨硬粉，梗係要買啦。
三包共1.5kg賣2歐，仲好香呀，冬天黎講，真係平到冇朋友。
呢種鮮紅同香氣令人心情愉悅呀！

士多啤梨王子就咁食都ok，但係我唔like呀。
我要食士多啤梨瑞士卷！
下午整咗一條，諗住俾個驚喜王子，做飯後甜品。
一條好容易被(王子)殲滅，(我)唔夠喉呀。。。

第二日王子放工，入屋唔係好似平時咁問候我，而係問有冇再整瑞士卷。。。
想做下實驗，改咗食譜同做法。
今次整大大條，仲係兩條！實夠食！大滿足！

今日情人節兼元宵，送上西門之貓情人節特別版，祝大家節日快樂！