免費慶生

王子問我想點慶生。
我想去個短假期，但王子嘅工作時間表唔容許噃，咁唯有留番响本地啦。。。
上網揾節目，無意中發現一糸列免費慶生嘅資料，連王子呢個土地人都唔知。
於是去咗其中一個地方免費慶生－Mineraltherme Böblingen。

屋企附近有大大小小嘅礦泉區，浸礦泉同飲礦泉水係本地人嘅一個習慣同文化，對皮膚同身體都好。

Mineraltherme Böblingen係其中一個礦泉浴，王子好鐘意呢個礦泉浴，話佢又大又正。

因為入面唔俾影相， 大家要透過連結睇相啦。

同日本唔同，啲水唔會太熱，話水太熱有危險，不同一樣有唔同溫度嘅池，亦有列明水嘅礦物質。

其仲一區有啲似泳池，會着泳衣浸架。另一區係各類型嘅Sauna，呢區就係天體嘅。
不同時段亦會提供不同嘅水療運動，有啲係用黎復康或者治痛症架。

當然都有按摩、美容、餐廳等服務啦。

是日有個大驚喜，就係天黑後突然落大雪，我哋即刻衝出去花園個礦泉浴。
靜態雪景加温泉我試過啦，礦泉浴加埋雪花飄揚仲係第一次，雪花加上水同燈光折射，黑暗中啲雪花閃閃發光。
個身呢就浸住礦泉但頭頂係雪，個情景好攪笑。。。